Tisha B'Av

Tisha B’Av (en ivrit תשעה באב) es el dia el mas triste del kalenderio djudio. El 9 de Av, anyo 586 antes de la Era Komun, el Bet Amikdash fue konkistado por los Babilonios. Los djudios fueron egziliados i fue el empesijo de lo ke se konose komo Galut. Es por esto, entre otros evenementos ke Tisha B’Av es nombrado komo "el diya de las lagrimas". Anyos dempues, el imperador persa Cyrus permetio a los djudios tornar a Yerushalayim i de fraguar muevamente el Bet Amikdash. El nasi Zakarias les disho a los djudios "Estos dias de tristeza, endagora deven de konvertirsen en diyas de alegriya". Ma afilu enel anyo 70 de la Era Komun, los Romanos destruyeron el Sigundo Bet Amikdash, ovligando a los judios a irsen a la Galut. Una vez otra, Tisha B’Av se konvertio en diya de dolyo. Afilu antes de ke los djudios entrassen a Eretz Yisrael, un 9 de Av, los espias ke Moshe Rabenu envio a Eretz Knaan tornaron de eya i sólu 2 de eyos tornaron tresalidos i avlaron kozas buenas de eya, kriando espanto i mankava fey entre la djente; por esto, El Dio dekreto ke esa djenerasion no iva entrar a Eretz Yisrael.

Djudios relijiozos meldando kinot enel Kotel.

Otras trajedias afitaron en diya de Tisha B’Av:

135: La kaida de Betar dio fin a la rebelion de Bar Kohba i la independensia djudia en Eretz Yisrael; Bar Kohba, Rabi Akiva i los sus elevos fueron amortados
136: Una sivdad pagana, Aelia Capitolina fue fraguada por los Romanos enel sitio de Yerushalayim, a la kuala les fue defendido a los djudios vijitar
1095: El Papa Urbano II atakanó el empesijo de las Krusadas en este diya^[1]
1242: Los Sifrei Tora i otros livros relijiozos djudios komo la Gemara, fueron kemados en Fransia.
1290: Los djudios fueron arrondjados de Ingleterra^[2].
1492: Los djudios fueron ovligados a abandonar Espanya, el kualo sinyifiko el empesijo de la Galut de los Sefaradim.
1942: El kampo de egzterminamyento de Treblinka, el primero de los sesh, es aperturado. Los djudios del Geto de Varsovia fueron embiados de la sivdad a Treblinka este diya.
1994: Mas de 80 djudios son amortados i 120 son feridos en el atentado en kontro de la AMIA, en Buenos Ayres, organisado por un grup terrorista islamiko kon linkes kon Iran
2005: Empiesa el vaziado de los yishuvim en Gaza

Kostumbras en Tisha B'Av

Tisha B’Av, ansina komo Yom Kippur, empiesa kuando se abata el sol, i se akaba kuando se abata el sol el dia suivante. Munchos anyos antes, los hahamim diziyan ‘Kuando viene Av, toda la alegria se va’. I ansi, del primer diya de Av, no se komiya karne, no se beviya vino, no se vistiya vistimientas limpias i no se aziya dinguna selebrasion ni se kantava dinguna kantika. La komida de la noche de Tisha B’Av deviya de ser modesta, komiyan solo guevos duros i fideyos. Los relijiozos se durmiyan en basho, kon una pyedra en lugar de kavesal. Enel diya de Tisha B’Av, no se puediya komer, bever, lavarse, uzar parfumes, vistirsen kalsados de kuero o partisipar a una okazion de plazer. Akel diya, los ombres no se ivan al lavoro i tambien era enterdido de meldar la Tora, porke meldar la Tora es una aktividad ke incha el korason de alegriya. Sólu el Livro de Lamantasiones i unos kuantos shapitros de Yirmiyahu se puedia meldar. Otra kostumbra vieja de Tisha B’Av era las vijitas al betahayim. Asigun la leyanda, los ombres grandes del pasado, los muestros hahamim, se alevantan de sus tombas enel diya de Tisha B’Av para yorar la pedrida de la gloria de Eretz Yisrael. En los vilajios i shtetls de Polonia i Ukraina, los ijikos chikitikos deshavan revolveres de tavla enriva de las tombas, deke los muertos se alevanten i gerreyen kon los inimigos de Israel. En Tisha B’Av, el Kal se transforma de una kaza alegre a una kaza de dolyo. Las luzes no se asienden, el Ehal se serra kon una ropa preta. El livro de Lamantasiones se melda en este diya.

Referensias

[1] Beganó: 9 de Av en la Historia

[2] What is Tisha B'Av?

[1]

[2]