Esnoga Bet El (Karakas)

La Esnoga Bet El o komo se le konose en la komunita de Venezuela, Asosiasion Bet-El es una esnoga ke se topa en la sivdad de Karakas, en la kuala se melda en el rito Sefaradi. La esnoga fue fraguada entre los anyos 1969 i 1973, kon parás ofresidas por el sinyor Edmond Safra, para el su uzo por la komunita halabi-Venezuelana de la sivdad ke bivía para antonses en la máale de San Bernardino. Endagora la komunita tambien tiene myémbros sobre tódu de Meliya (Espanya) i del Nord de Marroko, espesialmente de las sivdades de Tetuan i Chaouen.

Ehal de la esnoga.

La esnoga tiene el su adreso en la Avenida Cajigal de la máale. Tiene kapazitá para unas 300 personas en la seksiyon de ombres, la kuala esta yena de vitrales desinyados por Yaakov Agam, endemás de ke la pared ande se ankontra el Aron Akodesh es una eskultura de Harry Abend [1] [2]i para unas 100 personas en la seksiyon de mujeres en el piso de ariba. La esnoga endemas tiene una kamareta abasho, la kuala fue aperturada enel anyo 1988 [3]i ke se uza para fyéstas komo bar mitzvot, bat mitzvot, kazamyéntos i Sheva berahot. En el piso má alto de la frágua, al lado del area para meldar de las mujeres, se topa una kamareta uzada komo bet Midrash para el estudio de la Tora i la Gemara, la kuala tiene una biblioteka. Endemás, en la esnoga estan disponíveis humashim kon Rashi, sidurim en ivrit i sidurim kon traduksiyon i fonetika en espanyol para akeyos ke no avlan ivrit, o lo avlan poko i no saben meldar en ivrit.

Aktualmente, el haham de la esnoga es el sinyor Itshak Sananes.


ReferensiasTrocar

  1. Harry Abend. Museo Virtual - Venezuela Analítica
  2. Las sinagogas de Caracas y sus vitrales. Gentiuno.com
  3. FERCAM - Obras realizadas

Atamientos eksternosTrocar