Mayotte

Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

---

Mayotte (Maoré en swahili) es una dependensia de Fransia basho el status de Departamento de Ultramar i ke se topa al nord del Kanal de Mosambiko enel Oseano Indiko, entre el nord de Madagaskar i el nord de Mosambiko, en el arkipyélago de las isolas Komoras. Ansina komo los otros payises i territorios de ultramar de Fransia, Mayotte konforma parte del territorio de la Union Evropea. La su kapitala es la sivdad de Mamoudzou. La dependensia tiene 194.000 avitantes i una ekstension de 347 km². Esta konformada por dos isolas, Grande-Terre (o Maoré) i una isola chika, Petite-Terre (o Pamanzi), endemas de isolas muy chikas alderredór. El Departamento yeva el nombre de la isola mayor. Las lingua ofisiala es la lingua fransesa, anke el shimaoré, un lashon del swahili es avlado por más del 55% de la povlasion komo priméra lingua.

Mayotte enel arkipyélago de las Komoras

Mayotte enel Kanal de Mosambiko

Istorya

Mayotte, ansina komo las otras isolas Komoras izieron parte de Fransia desde el anyo 1843. Es la unika isola del arkipyélago ke votó en referendum para kontinuar konformando parte de Fransia (en 1974 i en 1976, kon el 63,8% i 99,4% respektivamente). Las Komoras ainda demandan la isola i endemas, el Konsejo de Seguridad de la ONU votó kon 11 de 15 votos para rekonoser la soberaniya de la Union de las Komoras en Mayotte, anke Fransia izo un veto a esta proposiziyon en 1976 i 2004. En Jenero del anyo 2014 se espera ke Mayotte seya parte integrala de la Union Evropea.

La situasion de Mayotte es zor para Fransia, deke mientres ke la majorita d ela povlasion no dezeya la independensia ni la union kon el resto de las Komoras, la komunita internasionala kritika muncho los lasos entre Fransia i Mayotte. Endemas, las leyes de la isola, las kualas tienen su baza en la Shariya, no azen kolay integrarsen kon la estruktura de leyes de Fransia, endemas de ke la kalidad de vida no esta al nivel de Fransia. Por esto, asta el anyo 2007, las leyes nasionalas fransezas tinían ke azer referensia a si tinían validad en la isola; ma dempués de 2007, son aplikadas kaji todas las leyes fransezas, egzepto alkunas.

Enel anyo 2001 el status de Mayotte fue trokado a Kolektividad Departamentala de Ultramar, un status paresido al de Departamento de Ultramar Fransez, komo Reunion, Guadalupe, Martinika i la Guayana Franseza. Este troko fue aprovado por el 73% de la povlasion de Mayotte. Afilu esta otonomiya, las Komoras demandan el kontrolo de la isola. Dempués del referendum del 29 de Marso de 2009, kon 95,2% de votos a favor, Mayotte se trokó el 31 Marso del anyo 2011 en un Departamento de Ultramar.