Moshe Haim Luzzatto

Moshe Haim Luzzatto (en ivrit משה חיים לוצאטו), tambien konosido por el su aktronimo en ivrit RaMHaL (רמח"ל), fue un haham, mekubal i filosofo italiano.

Luzzatto nasió en Padova, Italia el 26 Iyar de 5506 (1707) en una famiya djudia italiana konosida, la famiya Luzzatto, la kuala a dado grandes hahamim, komo Simone Luzzatto, el kualo fue rabino de Venezia i logro empedir la ekspulsion de los djudios de esta sivdad; el su padre era un merkader de sedas. Es posivle ke tinía estudios de la Universita de Padova i endemas tinía eskritos ke amostraban dominio i hohmá de la Gemara, la Tora i la Kabala. Los sus morim fueron el Rosh Yeshiva de la Akademia Rabinika de Padova, Yeshayahu Basan, avtor de Lahmei Tora i el Gaon Itshak Lampronti, avtor de Pahad Itshak. Desde muy mansevo amostro entereso en la kabala i muncha djente en la komunita djudia de Italia tinía suspechas de ke akabara komo Sabbatai Zvi, el falso mashiah, deké el dizía ke resivía lisiones de un ser mistiko yamado magid, lo ke yegó a ser konosido por un mekubal de Safed, Rafael Israel Kamhi i asta los rabino shefe de Altona, Moshe Hagiz i de Vilna, Yehoshua Heshel. Dempues de resivir amenasas de ser eksokomulgado por la komunita, achetó no eskrivir má nada relasionado kon las lisiones ke resivía del magid i deshar de ensinyar kualker koza relasionada kon el mistisismo djudio, sobre todu basho presiosn del sinyor haham Moshe Hagiz^[1]. Enel anyo 1735 se fue a bivir a Amsterdam, Olanda, ande esperaba ke komo era un paez muncho má libberalo, iva poder sigir kon su estudio mistiko. Al pasar en kamino para Olanda, en Almania pidió a los hahamim del paez una proteksiyon de las amenasas de los hahamim italianos, má lo huersaron a firmar un dokumento ande dizía ke todas las ensinyansas del magid eran mintira. De estos dokumentos sólu kedan alkunos tektsos, komo el 70 Tikunim `Hadashim, el kualo eksplika los 70 uzos del ultimo pasuk de la Tora; este livro es komparado kon Tikunei aZohar de Rashbi i, asigun Ramhal, le fue ensinyado palavra a palavra por el magid en arameo.

Kuando a la fin yegó a Amsterdam, pudo sigir estudiando kabala sin ke dingun otro haham lo trublara, afilú no sigió ensinyando mistisismo. Lavoraba komo kortador de diamantes i estudiaba. Es en este tiempo ke eskrivió la su obra por la kualo es má konosido, Mesilat Yesharim, un tratado de etika kon alkuna inspirasion mistika. Tambien eskrivió Derekh Hashem, un tratado el kualo estudia el propos de El Dio en la kriasion, la djustisia i la etika;Maamar Aikarim, otro tratado ke estudia el lavoro de El Dio enel mundo; Da'at Tevunot, un dialog entre la neshama i la hohma; i Derekh Tevunot, un eskrito el kualo apresenta la lojika de los debates talmudikos para un amijor entendimyénto del mundo.

Uno de muestros má grandes hahamim, el Gaon de Vilna, dizía ke, de estar vivo Ramhal kuando el konosió Mesilat Yesharim, avría kaminado desde Vilna a Amsterdam para konoserle i aprender de el;^[2]^[3] a esto se le konsidera uno de los mayores komplimentos entre hahamim. Ramhal tambien eskrivio poeziya i drama, kon muncha enfluensia de la poeziya djudia de Espanya i de Italia.

Enel anyo 1743, Ramhal se fue a bivir a la Tierra Santa para poder estudiar i ensinyar kabbala. Yegó a la sivdad de Akre. Ma tres anyos dempues, el i la su famiya murieron por una plaga. Un syéklo dempues de este, el movimento Musar dishkovrió los sus eskritos, i los adoptaron para eyos. Antonses el gran etiko de la Tora Yisrael Salanter (1810 - 1883) puso a Mesilat Yesharim enel plan de estudios de las prinsipales yeshivot de Evropa Oryentala. Endemas, los eskritores de la Askala, adoptaron versiyones modifikadas de los sus eskritos sekulares i lo yamaron el fondador de la literatura ebrea moderna. El su primo, el poeta Efraim Luzzatto (1729-1792), tambien tuvo enfluensia en los primeros eskritos de la poeziya modérna en ivrit.

Referensias

↑ Biografiya de Moshe Haim Luzzatto. Introduksiyon a Mesilat Yesharim. Por el haham Itshak Fadda. Ed. Avilarte. Karakas, 1989.
↑ Rabbi Jonathan Rietti, "Deepening one's relationship with G'd" lecture series, audio format
↑ Rabbi Moshe Chaim Luzzatto. Il Ramchal. I Grandi Kabbalisti. Centro Mondiale Bnei Baruch per gli studi di Kabbalah

Enlasos eksternos

Wikimedia Commons alberga kontenido multimedia sovre Moshe Haim Luzzatto

[1] Biografiya de Moshe Haim Luzzatto. Introduksiyon a Mesilat Yesharim. Por el haham Itshak Fadda. Ed. Avilarte. Karakas, 1989.

[2] Rabbi Jonathan Rietti, "Deepening one's relationship with G'd" lecture series, audio format

[3] Rabbi Moshe Chaim Luzzatto. Il Ramchal. I Grandi Kabbalisti. Centro Mondiale Bnei Baruch per gli studi di Kabbalah

[1]

[2]

[3]