Megorashim

Los megorashim (מגורשים, arrondjados) eran akeyos djudios sefardis ke yegaron a Marroko diskués de fuyir de los pogromos espanyoles en 1391 fina ser arrondjados de la Peninsola Iberika en la anyada de 1492.

Estos djudios, los kualos en su majorita tenían parás i eran de klasa alta i kon una kultura i lingua diferente de akeya de los toshavim, los dudios orijinalos de Marroko, los kualos avlavan arabo o linguas tamazight i kon tradisiones kon influensia del Islam. Los megorashim desharon marka en la komunita djudia del Maghreb, mesklando las sus tradisiones kon akeyas de los toshavim. Kon el tyempo las dos komunitas se mesklaron i oy endiya no es kolay azer diferensia entre una i otra komunita, ma djeneralmente son partajados en dos komunitas enel Maghreb: los sefardis, kon mas tradisiones espanyolas i portugezas i los mizrahis, akeyos kon tradision oryentala. Asigun Jewish Encyclopedia, de los 165000 djudios ke desharon Espanya enel anyo 1492, se kreye ke 32000 yegaron alas beiras de la Afrika del Nord, de los kualos 20000 verso Marroko, 10000 verso Arjelia i 2000 verso Tunesia., ma otros akademikos dizen ke no se puede kontar kuantos djudios bushkaron bivir en Marroko

Sosyeté i kultura

Los Megorashim tenían los sus propios shefes i hahamim, ansina komo endemas minhagim apropiados. Avlavan diferentes linguas de la Peninsola Iberika, asigun el orijin de la su komunita: Kastilyano, Aragonez, Katalan, Valensiano, Gayego i una forma standard de la lingua djudeo-espanyola yamada "ladino", la kuala es ainda uzada por la diaspora sefardi.