Angelika Schrobsdorff

Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

---

Angelika Schrobsdorff (24 de Disiembre de 1927 - 30 de Djulio de 2016) era una eskritora i aktrisa almana.

Angelika Schrobsdorff, enel anyo 2014

Biografiya

Schrobsdorff nasio en Friburgo, Almania en 1927, ija de Else Kirschner (1893–1949) i Erich Schrobsdorff (1893–1952), un zengin aristrokata prusiano de Berlin. Los su padres se espozaron kuando eya era de edad de tres anyos. Schrobsdorff kresio en Berlin fina 1939, kuando eya, la su madre i la su ermana bohora Bettina (1922–2007) fuyeron verso Sofiya, Bulgaria diskues de la deshadura de los sus padres. La su nona Minna Kirschner era amortada enel kampo de Theresienstadt: el su nono Daniel Kirschner murio de neumoniya en un espital de Berlin. Peter, el su medio ermano bohor ke la su madre tenia kon el eskritor Fritz Schweuert, fuyo verso Fransia en 1938, izo parte de la resistensia djudia en Fransia. Era amortado en Djenero de 1945.

Schrobsdorff abolto en 1947 para Almania, kon Edward S. Psurny, un ofisyal de la armada amerikana kon el kualo se espozo en Bulgaria. Bivieron unos anyos en Munih, ma diskues de la su deshadura eya izo aliya i bivio en Yerushalayim en las anyadas '60 i '70 ande konosio al direktor de sinema fransez Claude Lanzmann, kon el kualo se espozo en 1974 i kon el kualo bivio en Paris fina 1983, kuando abolto bivir en Yerushalayim, en la maale de Abu Tor fina 2006, kuando dechidio aboltar en la chika sivdad de Schmargendorf, serkana a Berlin.

Kariera

La primera novela de Schrobsdorff, Die Herren ("Los kavayeros", 1961) era una koleksion de kuentos ke eya tenia eskritos i ke arekojio en una novela por enkomendansa del eskritor Johannes Mario Simmel; el livro krio un kepazelik ke la izo konosida en toda Evropa por modre de las sus deskripsiones bashas i yenas de kontenido seksual. Endemas de Los kavayeros, eskrivio una dozena de livros, alkunos de eyos ensima de la su vida en Bulgaria.

El libro ensima de la vida de la su madre i la su relasion kon sus ijos i kon Almania,​ Du bist nicht so wie andre Mütter (Tu no eres komo las otras madres, 1992) aresivio muncha reushita i era adpatado en un filmo para televizyon en 1999 i tresladado al inglez komo You are not Like Other Mother en 2012, i al kastilyano komo Tú no eres como otras madres en 2016, el kualo era onorado komo el Livro del Anyo en Espanya.

Endemas de eskritora, Schrobsdorff era aktrisa, aparesiendo enel filmo alman Der Ruf ("El embabuko d'alkavo", 1949) i otros filmos para la televizyon de Almania ensima de a su vida; aparesio enel filmo dokumental del direktor bulgaresko Christo Bakalski "Bulgaria of all Places". La eskritora almana Rengha Rodewill eskrivio la su biografiya, Angelika Schrobsdorff - Leben ohne Heimat en 2017.

Muerte

Schrobsdorff murio el 30 de Djulio de 2016 en Berlin, Almania, de edad de 88 anyadas. El su puerpo esta enterrado enel Betahayim Weißensee de Berlin.

Ovras

• Die Herren (1961) ISBN 3-423-10894-0
• Der Geliebte (1964) ISBN 3-423-11546-7
• Diese Männer (1966)ISBN 3-442-01935-4
• Spuren (1968) ISBN 3-423-11951-9
• Die kurze Stunde zwischen Tag und Nacht (1978) ISBN 3-423-11697-8
• Die Reise nach Sofia(1983) kon akdama de Simone de Beauvoir, Deutscher Taschenbuch Verlag, Munih, ISBN 3-423-10539-9
• Das Haus im Niemandsland oder Jerusalem war immer eine schwere Adresse (1989) ISBN 3-423-11442-8
• Du bist nicht so wie andre Mütter (1992) ISBN 3-455-06773-5 traducido al español como "Tú no eres como otras madres" (2016) ISBN 978-84-16544-13-4
• Der schöne Mann und andere Erzählungen (1993) ISBN 3-423-11637-4
• Jericho: eine Liebesgeschichte (1995) ISBN 3-423-12317-6
• Der schöne Mann und andere Erzählungen (1993) ISBN 3-423-11637-4
• Grandhotel Bulgaria: Heimkehr in die Vergangenheit (1997) ISBN 3-423-12852-6
• Von der Erinnerung geweckt (1999) ISBN 3-423-24153-5
• Wenn ich dich je vergesse, oh Jerusalem (2002) ISBN 3-550-08389-0
• Der Vogel hat keine Flügel mehr. Briefe meines Bruders Peter Schwiefert an unsere Mutter. Koleksion de letras eskritas para el su ermano Peter, editada por Angelika Schrobsdorff, kon komentarios de Angelika Schrobsdorff i nd Claude Lanzmann. Akdama de Ulrike Voswinckel. (2012) ISBN 978-3-423-28008-2

Onores

• Orden de la Roza del governo de Bulgaria, 2007.
• Mujer del Anyo 2007 de la Sosyete de Sitizenas de Almania

Atamientos eksternos

• Trailer del filmo dokumentalo Ausgerechnet Bulgarien en YouTube