Adina Bar-Shalom

Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

---

Adina Bar-Shalom (ivrit: עדינה בר-שלום; nasida en 1945) es una ensenyante, eskritora i aktivista sosyala israeliana. Eya es la fondadora del primer kolej para elevos haredis en Yerushalayim, i endemas tiene lavorado munchos anyos gerreyando en kontro de la diskriminasion seksuala en la sosyete israeliana, espesialmente en las komunitas haredis.

Adina Bar-Shalom

Aresivio el Premio de Israel por las sus eskapasiones i kontribusiones en la sosyete israeliana enel anyo 2014.

Biografiya

Nasio komo Adina Yosef en Yerushalayim, la ija behora del haham Ovadia Yosef i la su espoza, Margalit Fattal. Bivio en El Kairo entre las edades de 3 i 6 anyos, deke el su padre era el prezidente del Beit Din de la sivdad i maestro en la yeshiva Ahava VeAchva del haham Aaron Shoueka. Ambezo en eskolas para mansevas relijiozas Beit Yaakov. Kuando ainda era manseva, ambezo shastreriya en una eskola Beit Yaakov.

Kuando era de edad de 18 anyos, se espozo kon el haham Ezra Bar-Shalom, ensinyo shastreriya i aperturo un gemah para mansevas espozadas kon menester de vistidos de espozamiento. En 1975, ambezo desen de modas enel Kolej Shenkar de Enjenieriya i Desen, diskues ke el su espozo i el su padre se opozaron a ke eya ambezara psikolojiya en la universita.

Enel anyo 2001, kon la lesensia del su padre, fondo el Kolej Haredi de Yerushalayim, el primer kolej aprontado espesialmente para elevos haredis.

Bar-Shalom bive oy endiya en la maale Ramat Aviv de Tel Aviv kon el su espozo, el kualo es un hakim relijiozo i ke antes era presidente del Beit Din de Tel Aviv. Tienen tres ijos: Hana, la kuala era la direktora del buro del diputado Shlomo Benizri, i esta espozada kon el avokato Moshe Shimoni, direktor djeneral de la asosiasion de guertelanos i era endemas el direktor djeneral del Ministerio de Maslahatos Relijiozos.

Aktivismo sosyal i politiko

Bar-Shalom entro al mundo politiko aziendo parte del grup de protestasion sosyala Tafnit, el kualo era fondado por Uzi Dayan, ma desho el grup kuando se troko en un partido poltiko para azer parte de las eleksiones de 2006. Diskues de esto dechidio fondar una organisasion para desvelopar el dialog entre djudios relijiozos i sekulares en Israel. Enel enverano de 2011, prinsipio a lavorar kon el Komite Spivak-Yona kon el buto de topar repuestas para amijorar las mankansas en la sosyete israeliana.

En Avril de 2011, asinyo una demanda para la fondasion de un estado Palestino kon frontieras bazadas en la linea vedre de 1967 i kon kapitala en Yerushalayim Oryentala, endemas de una retirada de las Alturas del Golan.

Bar-Shalom avla ensima de la emportansia del menester i dirito de las mujeres de ambezar i lavorar, i en 2013 suporto la fondasion de un partido politiko haredi kompozado solo de mujeres, en la sivdad haredi de El'ad. En 2014, era konsiderada una de las kandidatas para ser prezidenta de Israel, i acheto la kandidatura. En Marso de este anyo, eskrivio para un djurnal israeliano ke la revolusion feminista haredi ya egzistia, ajustando ke "el treno ya desho la estasion".

Malorozamente, en Oktobre de 2017, el Kolej Haredi de Yerushalayim era serrado. En Novembre de este anyo, era konvidada por el prezidente del partido Yesh Atid para azer parte de este.

Onores i premios aresividos

En Desiembre de 2012, aresivio el titolo de "Kavayera de Governo de Kualitad" del Movimento por un Governo de Kualitad en Israel. In 2013, Bar-Shalom era yamada por la revista Nashim, ke apartiene al djurnal Makor Rishon, komo una de las 20 mujeres relijiozas mas emportantes del payis. En Avril de 2013, aresivio un doktorat Honoris Causa de la Universita Ben-Gurion del Negev.

Enel anyo 2014, arevisio el Premio de Israel por las sus eskapasiones i kontribusiones en la sosyete israeliana, i era la ochena djudia kon mas enfluensia de esta anyada por el djurnal Jerusalem Post.