Vera Baboun
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
Vera George Mousa Baboun[1] (en arabi: فيرا جورج موسى بابون, nasida en Bet Lehem el 6 de Oktobre de 1963) es una politika palestiniana. Era la shefa del governo de la sivdad de Bet Lehem entre Oktobre de 2012 i May de 2017. Es la primera mujer en alkansar la shefatura de la sivdad.[2][3]
Biografiya trocar
Kariera akademika trocar
Ambezo literatura inglesa en la Universita de Beit Lehem, i tiene un maestrado en literatura afrikano-amerikana de la Universita Ebrea de Yerushalayim.[4] Lavoro komo direktora del lise katoliko de Beit Sahour i komo profesora de literatura ingleza en la Universita de Beit Lehem por 21 anyadas,[5][6] ande era la direktora de menesteres de elevos de la universita.
Es presidenta de la Sentro de Ayudo ala Famiya i los Ninyos,[4][6] i endemas bushkadora ensima de la enfluensia de la teknolojiya enel empuederamyento de la mujer enel Mundo Arabi.[4][5][6] Kuando era elekta shefa del governo de la sivdad de Bet Lehem, estava esperando aresivir ayudo para ambezar un doktorat en literatura de mujeres arabi-amerikanas.[4][6]
Kariera politika trocar
Para las eleksiones de 2012, Baboun era la shefa del blok Independensia i Dezvelopamiento,[7] el kualo era echo de 12 profisionalos musulmanos i kristianos del movimento Fatah unidos kon el buto de amijorar los servisios al sitizeno i dezvelopar el entereso en Beit Lehem para los turistos de Evropa i Amerika.[5] El su bloko era yamado el grup de los teknokratikos por Al-Ghad.[8] La su reushita en estas eleksiones no era esperada, deke los otros kandidatos eran muncho mas konosidos ke eya, endemas ke tenian el suporte de islamistos i palestinianos de siedra.[3] Para el 12 de Oktobre de 2012, Fatah iva ala kavesa de las eleksiones, kon un 49%,[9] ma afilu el su bloko reushito en las eleksiones el 20 de Oktobre de 2012[3] i Baboun era elekta la shefa del governo de la sivdad, kon una votasion de 9-6.[10]
El mas grande empedmyento de la reushita del su governo es la mankansa de lavoro, la mas grande de las sivdades de Sisdjordania, muchiguada kon el enchikesimyento de la komunita kristiana i la bariera israeliana de seguransa en Sisdjordania.[2][11] Tiene disho a los djurnales ke esperava aresivir parte del suporte ke la sivdad pedrio kuando Hamas tenia el governo.[12][13]
Dechidio no partisipar en las eleksiones de May de 2017 echas en las sivdades de Sisdjordania.[14]
Vida privada trocar
Es bivda i de relijion katolika[2][15] i es madre de sinko ijos kon el su espozo Jhony Baboun, el kualo murio en 2007.[3]
Referensias trocar
- ↑ Former Mayors - Bethlehem Municipality (en arabi)
- ↑ a b c New female mayor gears Bethlehem up for Christmas. Associated Press. (en lingua inglesa)
- ↑ a b c d Bethlehem Has New Female Mayor, Yet Same Old Problems. Al-Monitor (en lingua inglesa)
- ↑ a b c d Female candidate tops list to become mayor of Bethlehem. Ma'an News Agency (en lingua inglesa)
- ↑ a b c Palestinian women look to Bethlehem where Vera Baboun is running for mayor. Reuters (en lingua inglesa)
- ↑ a b c d VERA BABOUN Researcher, Palestine. Grace Network (en lingua inglesa)
- ↑ Bethlehem ballot 22 Oct 2012. Al-Ayyam (en arabi)
- ↑ فيرا بابون أول امرأة فلسطينية تصبح عمدة بيت لحم. Al-Ghad (en arabi)
- ↑ WEST BANK: Vera Baboun is campaigning to become the first female mayor of the city of Bethlehem. ITN (en lingua inglesa)
- ↑ فيرا بابون .. أول امرأة تتولى رئاسة بلدية بيت لحم. Al-Quds(en arabi)
- ↑ Bethlehem Christians feel the squeeze as Israeli settlements spread. The Observer (en lingua inglesa)
- ↑ Video: Betlemme cerca rilancio ma resta il Muro. Nena News Agency (en lingua italiana)
- ↑ Cum se sarbatoreste Craciunul in "miezul fierbinte" al Islamului. Finantistii (en lingua rumana)
- ↑ Bethlehem municipal council approves newly elected mayor. Ma'an News Agency (en lingua inglesa)
- ↑ Die Palästinenserin mit den markanten grünen Augen hat sich einiges vorgenommen. Die Welt (en lingua alemana)
Atamientos eksternos trocar
- Vera Baboun, la primera alcaldesa de Belén - ElDiario.es (en lingua kastilyana)