Timbuktu

Timbuktu
טימבוקטו
Tombouctou
Tumbutu

Paiz

Mali

Pozision

16°46′33″N 3°00′34″O

• Altura

261 m

Superfisia

n/d

Povlasion

32.414 mor.

• Densidad

n/d

Jentilisio

n/d

Alkalde

Haley Ousmane (ADEMA)

Pajina web

n/d

Timbuktu es una sivdad (apodada «la de los 333 santos») serkana al rio Nijer (a 7 km de distansia del rio), en la rejion del mismo nombre, en Mali. La su ubikasiyon jeográfika la aze un punto de ankontro entre Afrika Oksidentala i los nomadas beréberes i arabos del nord. Tiene una ekstensa istorya komo sivdad komersiala i de interseksiyon del la ruta komersiala transahariana de nord a sud. La sivdad es Erensia de la Umanidad, deklarada por la UNESCO por podre de los trezoros de la su arkitektura i su emportansia kulturala, enel anyo 1998^[1].

Istoria

Timbuktu fue morada desde el anyo 1100 AEK por puevlos ke bushkaron el punto ande el rio Nijer se dirijava verso el Sahara, ande las karavanas ivan verso el desyérto; los merkaderes uzavan gameyos i barkas. Ma esta kolonia era por la temporada de las luvias; kuando no aviyan inondasiones se kedavan unos tuaregos para kudiar el oasis.

La sivdad se enfloresio por modre de Mansa Musa, rey del Emperio de Mali el kualo tomo la sivdad enel anyo 1324.^[2]^[3]

Timbuktu gano su reputasion por ser una sivdad rika. Kuando el Rey Mansa Musa se iva verso La Meka se dize ke amostrava a la djente el oro ke tenia. Enel anyo 1350 el grande viajador i istoryano Iban Battuta vijitó la sivdad i kontó las rikezas ke vido en la yamada "Sivdad del Oro". Los Tuaregos tomaron atras la sivdad enel anyo 1433 i la sivdad kontinuo a enfloreser. El Emperador Songhai rovó los bienes de la sivdad i mato a los sivdadinos.

Marroko tomo la sivdad enel syéklo XVI i mataron munchos de la opposizion. Antonses, Timbuku empezó a eskayer. Enel syéklo XVIII se fueron ayi munchos exploratores evropeos. El Eskosezo Mungo Park, por enshemplo, fue matado de la parte de los nativos enel anyo 1806; un otro Eskosezo, Alexander Laing fue el primer evropeo a ver la sivdad en 1825, tentando kompletar la mission empesada por Mungo, anke a el tambien lo mataron los Arabos. Enel anyo 1828 el Fransez René Caillie reushó a entrar ayi vistido komo un Arabo. Se dize ke el mijor eksplorator fue el alman Heinrich Barth, el kualo arrivó ala sivdad enel anyo 1853 i se kedo ayi 6 mezes i trushó informasiones importantes.

Universita

En la sivdad se ankontra la prestijioza Universita de Sankore i de otras madrasas, i fue kapitala intelektuala, relijioza i sentro para la propagasiyon del Islam en toda Afrika durante los syéklos XV i XVI. Las sus tres grandes mishkitas, Djingareyber, Sankore i Sidi Yahya, son un arikódro de la edad de oro de Timbuktu.

Mishkita de Djingareyber

Afilú kontinuamente restorados, estos monumentos están oy endia basho la amenasa de la desertifikasiyon, ya ke la sivdad está prinsipalmente echa de barro.^[4] Asigun alkunos estudios, Timbuktu a tinido una de las priméras universitas del mundo. Akademikos lokales i koleksiyonistas ainda kontan con una empresionante koleksiyon de antikos tekstos grégos de akeya époka,^[5] i en el syéklo XIV fueron eshkritos i kopiados emportantes livros, establesiendo la sivdad komo sentro de una emportante tradisiyon eshkrita en Africa.^[6]