Mea Shearim

Mea Shearim, (en ebreo מאה שערים), es una de las máales mas antikas de Yerushalayim, limitada al nord por la kaleja Mea Shearim. Fue establesida enel anyo 1874 komo la sigunda máale ahué de las paredes de la sivdad vieja por una sosyeté de 100 personas. Reuniendo las parás, los haverim de la sosyeté merkaron un terreno ahuéra de la sivdad vieja, ke ya estava sobrepovlada i fraguaron una nueva máale kon la intension de amijorar la su kalidad de vida. En esos diyas poka jente salia de la proteksiyon de los muros de la sivdad; la tierra era zor de uzar i munchos ladrones arabos puedian atakar. Por eso de dize ke los primeros avitantes de Mea Shearim, las kuyas famiyas sigian al Gaon de Vilna, eran pioneros en todo el senso del biervo.

Una kaleja en Mea Shearim

El nombre "Mea Shearim" se deriva de un perek en la Tora - Bereshit 26:12. Its.hak asembro en akeya tierra, i en akel anyo kosecho "מאה שערים - sentenas"; El Dio lo tenía bendicho. Los avitantes asperavan ke, komo Its.hak, eyos prosperarian i disfrutarian de las bendiziones de El Dio. Alkunos interpretan el nombre literalmente, komo "100 Portas", ma no parese egzistir konsenso ni base para eyo.

Oy endia, Mea Shearim ainda parese una máale del Viejo Mundo enel sentro de una sivdad ke dezeya ser moderna. Kon la su majorita de povlasion siendo haredi, las kalejas azen pareser ke se esta andando ariéntro de un shtetl de la Evropa Orientala. La vida esta totalmente adjustada a la alaha, arrogamiento i al estúdio de teksos djudios. Las kostumbres en el vistir inkluyen abrigos pretos lungos i chapéyos pretos o kubiertos de piel de animal para los hombres, i vistidos de manga lunga i saya lunga para las mujeres. En alkunos grupos, las mujeres uzan medias lungas pretas todo el anyo, afilu en enverano. Las mujeres kazadas rigorozamente uzan munchas formas de kuvrirse los kaveyos, de pelukas a tókas. Los ombres tienen barbas i algunos dejan kreser en la su kara lungas patiyas, yamadas peyot o peyes en idish, la lingua ke avlan munchos, porke para eyos el ebreo es sagrado i para solo uzarlo en la esnoga. En shabat, alkunas mujeres i ombres uzan ropa de algun kolor mas klaro.

La povlasion

La máale esta povlada kaji del todo por judios ortodoksos hasidikos o haredim. Los grupos Hasidikos representados en Mea Shearim inkluyen Breslov, Slonim i Toldos Aharon. Mea Shearim es endemas la baza del movimento anti-zionista Neturei Karta.

Sinyal a la entrada de Mea Shearim

Reglas de la máale

Para alejar mujeres poko kuvijadas i alejar grupos grándes de turistas kuriozos, konsiderados ofensivos, se topan sinyales de "modestia" en inglez i ebreo en las sus entradas. para amostrar respekto, los visitantes a Mea Shearim deven fecnear las sigintes reglas:

• Vistido modesto para las mujeres i las muchachas, kon vistidos mas amasho de la diz, sin eskotes ni bluzas sin mangas
• Evitar visitar la máale en grupos grándes
• No se puede tomar fotós a los abitantes de la máale o filmarlos sin el su permiso.
• Durante shabat no se deve kortar shabbat de ninguna manera
• Evitar uzar simbolos kristiános o kamizas kon simbolos kristiános.