Bertha Solomon
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
Bertha Solomon (Minsk, 1 de Djenero de 1892 - Pretoria, 22 de Djulio de 1969) era una avokata i politika sud-afrikana, aktivista por los diritos de las mujeres i la prima mujer elekta a un posto publiko.
Biografiya
trocarSolomon nasio en Minsk el 1 de Djenero de 1892. De edad de katro anyadas, eya i la su ermana bohora eran yevadas por la su madre, Sonia Schwartz, en vapor fina Afrika del Sud, ande las asperava el su padre, Idel Schwartz.[1] Ambezo enel Anglican Diocesan College, enel kualo aresivio en 1911 un titolo de Literatura Klasika i diskues enel South African College, ande izo un master.
Kariera
trocarKariera akademika
trocarLavoro komo maestra de lingua latina en la Milburn House School for Girls. Diskues de mudarse a Djohannesburgo, ande prinsipio ambezar Dirito en la Universita de Sud-Afrika enel anyo 1923.[2] Solomon era la disena mujer enel payis en ser akseptada en la Sosyete de Avokatos de Djohannesburgo en 1926.[2]
Kariera politika
trocarSolomon izo aktivismo por los diritos de las mujeres del su payis, deke la majorita de los sus musteris eran mujeres kon munchos penserios d'akodro kon la ley, ke era bazada en la Ley Komun Olandeza del Kazamiento, asigun la kuala, las mujeres mankavan kapachita i los sus espozos tenian dirito ensima de las sus posesyones, ijos i paras.[1] Dechidio azer parte del Konsesho Nasional de las Mujeres, i uno de los primeros eshuersos ke izo era el dirito de las mujeres para votar en eleksiones, el kualo era aprovado en 1930 por modre de una kampanya ke eya dirijio.[2]
En 1933 era elekta komo diputada al Konsesho Provinsial de Transvaal, enel kualo lavoro sinko anyos.[1][3] En 1938, era elejida komo diputada al Parlamento de Sud-Afrika komo parte del Partito Unido komo representante de Jeppestown, maale de Djohannesguro ande vivian lavorantes, foksion ke izo fina 1958.[2]
Durante la su kariera en el parlamento sud-afrikano, lavoro para la kriasion de la Ley de Fechos Matrimonialos, konosida komo la “Ley Bertha”, la kuala era aprovada en 1953 i era la prima ley enel payis ke kudiava los diritos de las mujeres ensima de los sus ijos, las sus posesyones i sus paras.[1] Eya apresento el prodjekto de ley en 1944, ma era rechazado por el Senado del payis. Dechidio demandar al Primer Ministro [Jan Smuts]] ke abediguaran ensima de la posiyon en la ley de las mujeres en el payis; el raporto era aresivido kon reushita, ma el muevo partido enel governo, el Partito Nasional, enkorajo la tardransa en las diskusiones de la ley kon el buto de kriar las leyes del sistem de apartheid.[1]
Era una konosida aktvista sionista, vijoto varias vezes Israel i la Universita Ebrea de Yerushalayim. La su ija, Joan, se espozo kon Michael Comay, ambasador de Israel en las Nasiones Unidas entre 1960 i 1967.[3]
En 1967, aresivio un doktorat honoris causa de la Universita de Witwatersrand.[2] En 1968, izo publika la su otobiogafiya.
Famiya
trocarKonosio a Charles Solomon kuando lavorava en la eskola Milburn House School for Girls de Sivdad del Kabo, kon el kualo se espozo i bivieron endjuntos en Djohannesburgo. Tuvieron dos ijos, Frank i Joan.[1] Solomon murio el 22 de Novembre de 1969.[1][3]
Ovras
trocar- Time Remembered: The Story of a Fight. Otobiografiya. Timmins, 1968.
Referensias
trocar- ↑ a b c d e f g The Bertha behind the Bill that changed women’s lives. South African Jewish Report
- ↑ a b c d e Bertha Solomon. South African History Online
- ↑ a b c Bertha Solomon. Jewish Women's Archive