Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

Yarden Djerbi –en ivrit, ירדן ג'רבי‎– (Kfar Saba, 8 de Djulio de 1989), es una esportista israeliana de djudo.

Yarden Djerbi.

Biografiya trocar

Djerbi es djudia, nasio en Kfar Saba, Israel, i kresio en la sivdad israeliana de Netanya. Es alkunyada Jordan, Gerb, i Denush. [1] Es graduada en Ekonomiya i Administrasion de la Universita Avyerta de Israel.[2]

Karriera esportiva trocar

El empesijo de la karriera esportiva de Djerbi era kuando eya tinia 6 anyos, i eya treina kon el klub Meditav Netanya. Shani Hershko, el kualo era el treinador del ekip de Djudo israeliano de mujeres, es su treinador desde la su chikez.[3][4]

En 2007, gano el Shampiyonato Nasional de Israel. [5] En 2008, Djerbi gano el Shampiyonato Nasional de Israel, el Shampiyonato Nasional de Israel Sub-23, i aresivio el treser lugar en la kateggoiya Sub-20 enel Shampiyonato de Evropa de Djudo. [6] En 2009, gano el Shampiyonato Nasional de Israel i el evenemento de la Kupa Mondiala en Belo Horizonte, el doseno lugar en los Djuegos Makabeos de 2009, i el treser puesto en el Premio Grande de Qingdao.[7]

En 2010, kedo enel doseno lugar en el Premio Grande de Qingdao i en los evenementos de la Kupa Mondiala de Djudo de Baku i Birmingham; endemas eskapo tresera enel evenemento de la Kupa del Mondo en Varsovia, i eskapo enel sieteno lugar enel Shampiyonato Mondial en Tokio. [6] En 2011, gano el Shampiyonato de Israel, kedo en doseno lugar en los evenementos de la Kupa Mondiala de San Salvador i Miami, tresera enel Grand Slam de Mosku i el Masters de Djudo en Baku, i sinkena enel Shampiyonato Evropeo de Djudo de 2011 en Estambol. [6] Ma pedrio en la dosena ronda del Shampiyonato Mondial de Djudo de 2011 i no reushito klasifikar para konformar el ekip olimpiko de de Israel a los Djuegos Olimpikos de Londra.

En 2012, gao el evenemento de la Kupa del Mondo en Tashkent i el Shampiyonato Nasional de Israel, endemas de reushitar en eskapar kon el doseno lugar enel Shampiyonato Evropeo de Djudo de 2012 en Rusia, i el treser lugar enel Premio Grande de de Düsseldorf. [8]

En 2013, antes de los shampiyonatos del mondo, gano el Grand Slam de Baku i el Grand Slam de Mosku, i eskapo enel doseno lugar del Premio Grande Samsung, i el tresero en el Premio Grande de Dusseldorf i en el Shampiyonato Evropeo de Djudo de 2013.[6] Reushito arivar al primer lugar enel ranking mondial de djudo en la kateggoriya de -63 Kg en mayo de 2013.[9]

Shampiyona del Mondo 2013 trocar

En Ogusto de 2013, de edad de 24 anyadas, aresivio la medalya de oro enel Shampiyonato Mondial de Djudo de 2013 en Rio de Janeiro en la kateggoriya -63 kg (139 lbs.), ganando a kada una de las sus sinko opozadoras sin sehora. [3][10] Eya gano ala dosena djudoka enel ranking mondial, Clarisse Agbegnenou, de Fransia, shampiyona de Evropa, en la kompetensia finala kuando le ahariento el ombro i la desho sin konosensia kon un apretamiento en 43 sigundos. [11] Enrejistro viktorias por ippon en kada una de las sus sinko gerras para arivar al shampiyonato. Komentando ensima de la reaksion de los israelianos kon la su viktoria, eya disho: "me propozaron tres ombres para espozar kon eyos."[12]

Djerbi es la primera israeliana en aresivir una medalya de oro enel Shampiyonato Mondial de Djudo. Los israelianos Yael Arad, (1991 - bronse, 1993 - plata), Oren Smadja (1995 - plata) i Ariel Zeevi (2001 - plata) kada uno tenian medalya de plata en los shampiyonatos, i Alice Schlesinger aresivio una de bronse en 2009. Era yamada la Esportista Israeliana del anyo 2013 por los lektores del djurnal The Jerusalem Post. [13]

2014-2016 trocar

Enel Shampiyonato Mondial de Djudo de 2014 en la sivdad rusa de Tchelyabinsk, Djerbi aresivio la medalya de plata diskues de pedrer por un ippon en kontro de la franseza Clarice Agbegnenou en la gerra final en la kateggoriya de menos de 63 kilos. [14] En Disiembre de 2014, era yamada Esportista Israeliana del Anyo por el Komite Olimpiko Israeliano. [15]

En 2015, aresivio una medalya de bronse en los Djuegos Evropeos de Baku 2015.[16] El 17 de oktobre de 2015, Djerbi aresivio la medalya de bronse en el Grand Slam de Paris, diskues de ganar a Miho Minei de Djapon.[17] Dos semanas mas tadre, el 31 de Oktobre de 2015, gano otruna vez la medalya de bronse, esta vez enel Grand Slam de Abu Dhabi, diskues de ganar a Juul Franssen de los Payises Bashos. [18]

Djerbi aresivio una medalya de bronse para Israel en los Djuegos Olimpikos de 2016 en Rio de Janeiro, Brasil, en la kateggoriya de –63 kg. Para klasifikar ala turne olimpika, kale estar entre las 14 amijores djudokas en kada kateggoriya al 30 de mayo de 2016.[19]

Medalyas internasionalas aresividas trocar

Djuegos Olimpikos
Anyo Lugar Medalya Kateggoriya
2016 Rio de Janeiro     –63 kg
Shampiyonato Mondial
Anyo Lugar Medalya Kateggoriya
2013 Rio de Janeiro     –63 kg
2014 Tcheliabinsk     –63 kg
Djuegos Evropeos
Anyo Lugar Medalya Kateggoriya
2015 Baku     –63 kg
Shampiyonato Evropeo
Anyo Lugar Medalya Kateggoriya
2012 Tcheliabinsk     –63 kg
2013 Budapest     –63 kg
2015 Baku     –63 kg

Referensias trocar