Shehrazad
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
Shehrazad, o Shahrazad (en farsi: شهرزاد Shahrazād; Šīrāzād [شیرازد] asigun Masudi, i Šahrāzād [شهرازاد] asegun ibn al-Nadim —ke sinyifika "akeya ke es reyna i tiene el pueder'—, nombre konformado por šahr [شهر] —'akeya ke tiene un reynado'— i āzād [ازاد] —'de nobleza'—) es la kontadora de la ovra tradisionala araba Las mil i una nochadas.
La istorya kuenta ke el sultan Shahriar (en lingua persa: شهريار 'gran rey') se espozava kada diya kon una manseva virgen i mandava le kitaran la kavesa el diya diskues de espozarse kon eya..Todo esto lo azia para vengarse de la su primera espoza, ala kuala topo kon otro ombre. Kuando konosio a Shehrazad, ya 3000 mujeres tenia matadas diskues de espozarse kon eyas.
Anke el su padre no keria ke eya se espozara kon el rey, Shehrazad aksepto kedarse una nochada kon el. Kuando yegaron ala kamareta, Shehrazad demando del sultan lesensia para dezir "adio" a su kerida ermanika, Dunyazad. Kuando el rey aksepto la su demanda i diskues de topar la su ermana, komo tenia planeado, Shehrazad dechidio kontarle una istorya durante toda la nochada al rey. Mientres eya kontava, el rey eskucho kon atansion toda la istorya, sin kedarse dormido i ala fin demando otra, ma Shehrazad le disho ke no tenian mas tyempo pues ya estava esklaresiendo. Antonses, el rey dechidio perdonarla esa vez, deke la proksima istorya puedia ser mas interesante i el keria eskucharla.
Ansina, el rey no mando a matar a Shehrazad, mientres ke demandava el empesijo de kada mueva istorya ke eya kontava, asta ke diskues de mil i una nochadas de istoryas, i ya kon tres ijos, no solo el rey estava kontente kon las istoryas de la su mujer, ma ambezo en moral i komportamyento por Shehrazad, ala kuala antonses izo la su reyna.
El orijin de estas istoryas se topa en una antika ovra persa yamada Hezar-afsana o los Mil mitos (persa: هزارافسانه).
Shehrazad es identifikada, konfozada o en parte derivada de la reyna Homāy, ija de Bahman, la kuala era yamada Čehrzād o Čehrāzād (چهرازاد), 'akeya de apariensia novle'. Endemas se kreye ke la madre de Harun al-Rashid, Al-Khayzuran, inspiro la kriasion de Shehrazad.
