Sara Braun

Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

Sara Braun Hamburger (Talsi, 16 de Disiembre de 1862 - Vinya del Mar, 22 de Avril de 1955)[1] era una negosiante letona de orijin djudio, la kuala bivio en Chile.

Sara Braun, c. 1900.

BiografiyaTrocar

 
Salon del Palasio Sara Braun, ande Braun i la si famiya bivieron en Punta Arenas.

Ija de Elias Braun i Sofia Hamburger, Sara nasio en 1862 en la sivdad de Talsi, la kuala se topa en la rejion de Kurlandia ke apartenia al Imperio Ruso, i oy endiya es parte de letonia. La su famiya era de orijn djudio,[2] la kuala desho Kurlandia por modre del muchiguamiento de;l antisemitizmo en la Rejion de Asentamiento.

Vida en ChileTrocar

Endjuntamente kon los sus padres i ermanos, viajaron primeramente ala sivdad de Buenos Ayres, i diskues arivaron a Punta Arenas, Chile, kapitala de la rejion de Magayanes, ande se establesieron en 1874. En esta sivdad gozaron de los provechos ke las otoridades del payis davan para muchiguar el numero de inmigrantes. Anke yegaron proves, la famiya Braun Hamburger tenia aresivido edukasion formala, la kuala azia ke la djente les diera onor.

El su padre, Elias Braun, era tenekedji i reusho tener una chika azyenda, la kuala muchiguo kuando dechidio lavorar endjuntamente kon Jose Nogueira, konosido negosiante marinero de orijin portuguez, eksportador de kueros de lovos de mar i otras bestias, endemas de otros ofisios. El padre de Braun sresivio la figuzia de Nogueira i era kontratado para kuladear el su magazen enel porto, i Sarika dava ayudo al su padre enel magazen.[3] En 1887, Sara Braun se espozo kon Jose Nogueira. Diskues de espozarse kon Nogueira, yego a ser una de las mujeres mas rikas de la sivdad de Punta Arenas.

En 1888, Nogueira i Braun arkilaron por 20 anyadas 1.009.000 de ektareas de tierra al governo del presidente José Manuel Balmaceda, kon el shurut de estableser una sosyete Chilena para lavorar la tierra. Nogueira i la su famiya aresivieron en total el kontrolo de una tresera parte de las 3 milyones de ektareas de tierra de Tierra del Fuego.[4] Kon el buto de azer la su sosyete chilena (Nogueira i Braun no eran ainda sitizenos de Chile) Nogueira akodro vender la tresera parte de los sus diritos al sinyor Ramón Serrano Montaner. Ma antes de enrejistrar la Sosyete Eksplotadora de la Tierra del Fuego, Nogueira murio en 1893, hazino kon tuberkuloz.[4] Braun dechidio tomar el kontrolo de los negosios del su espozo, kon el ayudo de los sus ermanos Mauricio (Mortiz) i Oscar, yegando a ser la primera mujer negosiante de la istoria de la rejion de Magayanes. Esta azyenda la uzo para dar ayudo ala su famiya i diferentes sosyetes de bienefisensia, komo la Kruz Kolorada de Punta Arenas.

Sosyete Eksplotadora de Tierra del FuegoTrocar

Diskues de eredar todos los negosios del su espozo, egzepto la parte de Serrano Montaner, Braun avlo kon el su ermano Mortiz kon el buto de bushkar pagar la devda kon Serrano. Finalmente, Serrano akodro aresivir 100 aksiones de la sosyete, al lugar del arkilo. La sosyete era establesida el 31 de Ogusto de 1893. Los aksionistas prinsipalos eran Braun, el su ermano Moritz i otros miembros de la su famiya; Juan Blanchard, de la sosyete Braun & Blanchard;[4] i Peter H. McClelland, de la sosyete Duncan, Fox & Co., Ltd.[3][4] Este grup tenia kaji el 50% de las aksiones de la sosyete. Kon el buto de ke la majorita de la sosyete kedara en manos chilenas, otrunos negosiantes de Magayanes i Valparaíso dieron paras en trokamiento por aksiones.[4] Enel prinsipio, la sosyete tenia kodreros i merkava las bestias bivas i la su karne.

Endemas de los arkilos de tierras en la Patagonia Chilena, Braun aresivio los otros negosios de Nogueira en la su erensia, i establesio una entreprisa de importasion i un grupo de butikas.[5] Krio una entreprisa de ganado kon McClelland[5] i dechidio importar kodreros. Enel empesijo de la entreprisa, trusheron empiegados de otros payises kon el buto de lavorar kon el ganado, ansi komo teknolojiya para los tonedores de los kodreros i de prosesamiento de la lana. Kuando la sosyete kresio, dieron lavoro a sitizenos de la rejion. El nombre de la Sosyete Eksplotadora de la Tierra del Fuego, la kuala dava provechos a los sus empiegados, komo pueder merkar komida kon kredi fina el plazo d'avenir, era bueno en la rejion de Magayanes.

En 1895, Braun trusho a Numa Mayer, una ariketkta franseza kon el buto de fraguar un palasio enel numero 716 de la kaleja Muñoz Gamero, en Punta Arenas. La fragua, en estil neoklasik fransez, era eskapada en 10 anyadas i tenia un guerta de envierno i kolonas en la su entrada. Por arientro el palasio tenia mobles evropeos.[6]

MarazaTrocar

El desvelopamiento de la industria de la lana i kodreros de la Sosyete en la Patagonia echo a los avitantes orijinalos de las tierras de la Sosyete. El fraguamiento de serkas krio obstakolos al puevlo Selk'nam i el muchiguamiento del numero de kodreros echo de la rejion al su prinsipal alimento, el guanako.[7] Ambiertos, rovavan kodreros. La Sosyete demando i aresivio lesensia del governo chileno para echar a los selk'nam de la rejion.[8]José Menéndez, uno de los miembros de la sosyete i es.huegro de Moritz, dio la su orden para amatar al puevlo selk'nam[7]. Asigun el raporto de la Komision de Vedrad Istorkika:

La Sosyete Eksploradora de Tierra del Fuego desvelopo aksiones en kontro de los indianos, deke metio kodreros en las tierras de la Sosyete, ke se topavan enel sentro de las tierras de los selk'nam, fraguo sentros de lavoro de lana i metio serkas en los kampos, metiendo limitos a los selk'nam...kon el buto de kudiar el su negosio, la Sosyete trusho empiegados ke izieron una vedradera gerra kon los indianos (…) Estos empiegados, endjuntamente kon los de otras sosyetes, kavzo direktamente la muerte de mas de 300 indianos[9]

Es por esto ke esta konsiderada komo una de las otoras (indirektamente) del djenosidio de los Selknam.[7]

BenefisiensiaTrocar

Diskues de la Revolusion Rusa i la Primera Gerra Mondiala, el muevo movimento progresista interasional krio atension en los penserios sosyales por enriva del kresimiento de las entreprisas, espesialmente la kalida de vida de los lavorantes. La Sosyete Eksplotadora de la Tierra del Fuego prinsipio fraguando kazas para los sus empiegados, los kuales bivian en eyas kon las sus famiyas i dava alimentos i madera para kalentar las kazas en envierno.[4] Endemas, Braun se dediko a aktivitas de benefisiensia, komo la Kaza de Guerfanos de Punta Arenas, la Kruz Kolorada de Chilena, la Gota de Leche, la Liga de las Damas Katolikas i la Sosyete de Dolores de Benefisiensia.[10] Endemas, dio donasiones ala Seisena Kompanya de Pomperos,[3] tierras para fraguar eskuelas en la sivdad de Punta Arenas i el portal de entrada al Betahayim de Punta Arenas.[10] El 7 de djunio de 1930, Braun se izo sitizena chilena[3]y se mudó a Viña del Mar.[10]


El Ministerio de Edukasion de Chile dio el su nombre al Lise de Mansevas de Punta Arenas, por modre de la su benefisensia en la sivdad en 1936; ya la Eskola de Artes i Ofisios de la sivdad era yamada kon el su nombre desde 1919. Aresivio una medalya de la sivdad de Punta Arenas komo la su "Benefaktora Puvlika" en 1945.[11] En 1948, dio una fragua para la Kruz Kolorada de Chile, ma por modre de la su hazinura, el diskorso lo meldo el su ermano Moritz.

Morte i erensiaTrocar

Braun murio en la su kaza de Vinya del Mar el 22 de Avril de 1955[3] i era enterrada enel Betahayim de Punta Arenas, el kualo era ofisialmente yamado Betahayim Sara Braun.[12] Komo no desho ijos, dio la su erensia al su ermano Juan Braun i sus sovrinos. la su sovrina, Fanny Gazitúa, la kuala kudio de eya en su hazinura, aresivio el chiflik, la kaza en la kaleja Álvarez kon todos sus mobles i enkargada de konstituir una Fondasion kon el su nombre kon el buto de dar ayudos para la edukasion de elevos de eskola.[3]

Diskues de la muerte dr Braun, las bandieras de la sivdad de Punta Arenas eran bashadas ala mitad, las butikas serraron en onor de eya i los politikos de la sivdad meldaron diskorsos en onor de Braun.[3] Endemas de la erensia para la su famiya, Braun dio mas de 15.000 aksiones de la Sosyete Eksplotadora de la Tierra del Fuego a amigos i servientes de la su kaza, endemas de otrunas personas ke dieron ayudo a kreaturas de famiyas proves o djente aedada i bivdas. Desho endemas aksiones a varias sosyetes de benefiensiensia de la sivdad, endemas del Espital San Juan de Dios de Vinya del Mar, el Espital de Kreaturas de Valparaiso, i el Betavot de Punta Arenas.[3]

En 1981, la kaza de Braun, el kual era merkado diskues de la su muerte por el Union Club de Punta Arenas, era deklarado Monumento Istoriko de Chile i yamado Palasio Sara Braun.[6]

Ver endemasTrocar

ReferenciasTrocar

  1. El mito de Sara Braun en el Cementerio de Punta Arenas. Patagonia Chilena
  2. Monte León. «Familia Braun». Archivado desde el original, el 5 de marzo de 2016. Consultado el 11 de abril de 2015.
  3. a b c d e f g h Gallegos Celis, Francisco. Testamento de Sara Braun Hamburger. Magallania. Punta Arenas, 2015. doi=10.4067/S0718-22442015000200011
  4. a b c d e f Martinic B., Mateo. Recordando a un imperio pastoril: La Sociedad Explotadora de Tierra del Fuego (1893-1973). Magallania. Punta Arenas, 2011. doi=10.4067/S0718-22442011000100001
  5. a b Vínculos de parentesco y poder de la familia Braun Menéndez
  6. a b INMUEBLE DENOMINADO PALACIO SARA BRAUN
  7. a b c [https://www.museodemagallanes.gob.cl/645/w3-article-48582.html Braun Menéndez: responsabilidad en la matanza Selk'nam. Muzeyo Rejional de Magayanes. (en lingua kastilyana)
  8. Marchante, José Luis Alonso (2014). Menéndez, rey de la Patagonia. Santiago, Chile: Editorial Catalonia. ISBN 978-956-324-316-1
  9. Informe de la Komision de Vedrad Istorika i Tratamiento Muevo kon los puevlos indianos Komision de Verdad Istorika i Tratamiento Muevo. (2008)
  10. a b c Los creadores de la Sociedad Explotadora de Tierra del Fuego
  11. Sara Braun, empresaria y filántropa. FEM Patagonia
  12. Efemérides: Al morir Sara Braun, nace un mito en el cementerio

Enlaces externosTrocar

Sara Braun Hamburguer. Memoria Chilena