Rojda Felat
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
Rojda Felat (nasida en 1980) es una komandante kyurdi arami de las Unitades de Defensa de Mujeres (YPJ) i las Huersas Demokratikas de Surya (SDF), la kuala tiene partisipado desde 2013 en la gerra en kontro del Estado Islamiko de Irak i el Levante. Una feminista revolusionaria, el buto de Felat es konsigir un trokamiento kompleto enel Oryente Medio kon el ayudo de las YPJ, "aziendo libberas las mujeres kurdis i aramis del kontrolo de la sosyete tradisionala, endemas de kitar de Surya todo el terrorizmo i la diktatura".[1][2][3]
Biografiya
trocarRojda Felat tiene kontado muy chikos detalyos ensima de la su vida, i por esto la su biografiya desde antes de tomar armos es kaji totalmente deskonosida;[2] ainda no es konosida kon presizion la su edad. Por modre de esto, T-Online la deskrive komo "misterioza".[4] Se kreye ke nasio en los anyos 80,[1] i el buro turkano de haberes Jihan News[4] afiksando la anyada del su nasimyento en 1980 en Al-Hasakah.[2] Otrunos artikolos de otros buros de haberes tienen konfirmada esta informasion.[5][6] Egzisten buros de haberes ke dizen ke Felat nasio en 1962, 1966 o 1968, afilu diziendo ke eya nasio en Batman, Turkiya; ma esto era negado por un aktivisto serkano a eya, ke disho a T-Online ke eya era definitivamente una Kyurdi de Surya.[4]
Kariera en armos
trocarFelat dechidio apartener al YPJ en 2013, i kresio en las huersas fina ser una de las komandantes mas emportantes de estas huersas.[1][2] La majorita de las sus aktivitas antes de 2016 no son konosidas, deke eran aksiones enkuvijadas.[4] Felat se konsidera ke es una feminista radikala,[1][2] ke gerreya por trokamientos en la sosyete arami ke pueden amijorar los diritos i la vida de las mujeres del payis, sin emportar el su orijin etniko o relijiozo.[7] Eya es endemas kritika del kapitalismo, diziendo ke "el sistem kapitalista nos mira [las mujeres] komo objektos".[5] Komo shefa militar, es enspirada por Otto von Bismarck, Napoleon, Selahaddin, ansina komo Arin Markin, una peleadora kyurdi ke se kito la su vida durante el Atako a Kobanî antes ke ser echa kaptiva por ISIL.[1][2][3] Kuando le tienen demandado ensima de las kapachitades de las mujeres peleadoras basho el su komando, Felat tiene komentado le "Munchas vezes, en menesteres de gerra, la djente kreye ke las mujeres somos delikadas, ke no puedemos uzar armos o afilu un kuchiyo. Ma pueden mirar klaramente ke mozotras las mujeres del YPJ puedemos uzar una dushka, aprontar almirez i dirijar aksiones de kitado de minas."[6]
Felat izo parte de la kaptura de Tell Hamis durante el primer atako verso al-Hasakah, el atako verso Tell Abyad,[8] i el Atako de Al-Shaddadi.[1] En May de 2016 eya era la shefa del primer atako en kontro de la sivdad kapitala de facto de ISIL, Raqqa, mientres ke komandava unos 15,000 peleadores.[1][2] Las sus huersas tomaron 23 viyas,[9] anke ala fin, el atako no reushito kompletamente, deke el SDF troko los sus peleadores para el atako a Manbij, el kualo tuvo mas reushita, i enel kualo Felat era una de las komandantes.[10] Enel enverano de 2016, un atako kon bomba de ISIL en un espozamiento en Al-Hasakah mato 22 miembros de la su famiya.[10]
En Novembre de 2016, el SDF organiso otruna kampanya kon el buto de kapturar Raqqa, i Felat era la komandante de las huersas en la parte del norte de Raqqa. Esta vez, las huersas de Felat reushitaron tomar los sus objektivos, por lo kualo el SDF troko los sus es.huersos para tomar la Baraj de Tabqa i la rejion serkana.[11] En la dosena parte del atako, la kuala prinsipio el 10 de Desiembre de este anyo, Felat era yamada una de las prinsipalas komandantes de las unitades del YPJ ke azen parte de los atakos.[10][12] En los atakos echos mas tadre en la kampanya de kaptura de Raqqa, Felat era ainda una de las komandantes mas emportantes del YPJ,[8] i gerreyo en los atakos kon el buto de kitar la Baraj de Tabqa, la Baza de Tabqa, i la sivdad de al-Thawrah del kontrolo de ISIL.[13]
El 25 de Avril de 2017, Felat vijito el lugar atakado por la Huersa Aerea de la Turkiya en kontro del YPG serka de al-Malikiyah endjuntamente kon shefes del YPG i shefes militares de los Estados Unidos.[14]
En Oktobre de 2017, Felat dirijava una unitad de peleadores del SDF ke reushito en tomar Raqqa. Felat i otros peleadores eran mirados kon bandieras del SDF en la plasa al-Naim de la sivdad kapitala del Estado Islamiko diskues de reushitar en la Batalya de Raqqa.[15][16]
Referensias
trocar- ↑ a b c d e f g Revolutionary Kurdish feminist leads assault on Raqqa. The Times (en lingua inglesa)
- ↑ a b c d e f g Rojda Felat: Kommandeurin der Offensive gegen den IS in Raqqa und Bismarck-Fan. Süddeutsche Zeitung (en lingua alemana)
- ↑ a b Rojda Felat: The feminist taking on Isis. The Independent (en lingua inglesa)
- ↑ a b c d Geheimnisvolle Kurden-Kommandantin jagt den IS. T-Online (en lingua alemana)
- ↑ a b The revolutionary women of the YPJ lead fight for liberation on International Women's Day. Kurdish Question (en lingua inglesa)
- ↑ a b Syria Kurd women fighters out for revenge against jihadists. Al-Monitor (en lingua inglesa)
- ↑ Rojda Felat: History will write about the women who fought in Raqqa. Hawar News Agency (en lingua inglesa)
- ↑ a b Meet the Kurdish woman leading battle against IS in northern Syria. Al-Monitor (en lingua inglesa)
- ↑ قوات سوريا الديمقراطية تتقدم نحو الطبقة وتسيطر على 12 قرية ومزرعة وترفع عدد قتلى تنظيم “الدولة الإسلامية” إلى نحو 80 Syrian Observatory on Human rights (en arabi)
- ↑ a b c Kurdish woman fight double battles against terrorism, patriarchy. Kurdistan24 (en lingua inglesa)
- ↑ Kurdish female fighters playing key role in battle for Raqqa ARA News (en lingua inglesa)
- ↑ Wrath of Euphrates Operations Room, commandant Rojda Felat, Northern Raqqa. YPG (en lingua inglesa)
- ↑ Raqqa will soon be encircled from four fronts: Rojda Felat. Hawar News Agency (en lingua inglesa)
- ↑ Turkey bombs US partner group; Afghanistan’s ISIS is losing recruits; Shows-of-force in Korea; F-35s in Estonia; and just a bit more.... Defense One (en lingua inglesa)
- ↑ Forces battling ISIS in their Raqqa stronghold declare victory. The Associated Press (en lingua inglesa)
- ↑ Isil's caliphate 'capital' in Raqqa falls after last jihadists surrender. The Telegraph (en lingua inglesa)
