Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

Maha Ali (Arabo: مها علي; nasida el 17 de Mayo de 1973) es una politika de Djordania i endemas injeniera industriala. Era la anterior Ministra de Industria i Negosio del Reyno Achemita de Djordania, diskues de los trokamientos enel governo de Abdullah Ensour el 2 de Marso de 2015.[1]

Maha Ali.

Biografiya trocar

Maha Ali nasio en Amman, sivdad kapitala de Djordania, en 1973.[2] El su padre es un konosido doktor i djeneral de las Huersas Armadas de Djordania. Eya avla arabo, inglez i fransez. Ali tiene aresivido un B.Sc. en injenieriya industriala de la Universita de Djordania, un titolo de politika de negosios de la WTO en Suisa i un MBA de la Universita Almana de Djordania.[2]

Kariera politika trocar

El empesijo de la kariera politika de Ali era en 1998. Desde Ogusto de 1998 fina Fevrero de 2001, lavoro komo peskisadora en la Organisasion Mondiala de Negosios. Diskues lavoro komo la shefa de negosios enel Departamento de Politikas de Negosios Internasionales fina Avril de 2002. Entre Avril de 2002 i Avril de 2003, lavoro komo la konsejera ekonomika del buro permanente de Djordania en las Nasiones Unidas. En Oktobre de 2003 era yamada direktora del Departamento de Politika de Negosios Internasionales fina 2010, kuando era yamada Sekretaria Djenerala de este ministerio.[2]

Kuando lavorava enel ministerio komo Sekretaria Djenerala, era la gia de los akodros echos kon el buto de la entrada de Djordania en la WTO i endemas la shefa del ekip del payis en bushkida de azer parte de la OECD.[3] Ali endemas aresivio los musafires diplomatikos en la reunion del Deauville Partnership en 2012 i en kada reunion kon otros payises ke keren azer negosios kon Djordania. En munchos enkontros era la shefa del ekip djordano en los akodros de negosios entre Djordania i los Estados Unidos, Singapur, Kanada i la Turkiya.[2]

 
Ali en las diskusyones de negosios entre Kina i Djordania en 2015.

Ali lavoro en munchas organisasiones del governo de Djordania, komo Jordan Enterprise Development Corporation, Jordan Investment Board, i Jordan Development Zones Company antes de ser yamada ministra.[4]

El 2 de Marso de 2015, diskues de trokamientos en el doseno governo de Abdullah Ensour, era yamada Ministra de Industria i Negosios.[1]

Kariera akademika trocar

Diskues de eskapar su lavoro enel governo, dechidio lavorar komo profesora en la Eskola de Administrasion i Sensias Lojistikas en la Universita Almana de Djordania, espesialmente en Negosios Internasionales.[5]

Onores aresividos trocar

Ali era yamada la Ochena Mujer mas Puederoza del Mundo Arabo enel Governo por la revista Forbes in 2015[4] i tiene aresivido medalyas del Rey Abdullah II por el su lavoro sitizeno, komo la Medalya de la Independensia en la klasa tresera.[2]

En 2016, aresivio la Medalya del Governador Djeneral del Governador Djeneral de Kanada, por el su es.huerso en muchiguar los negosios entre Djordania i Kanada.[5]

Referensias trocar

  1. a b Cabinet reshuffle sees five ministers in, four out. Jordan Times. (en lingua inglesa)
  2. a b c d e Resume - Maha Ali. Ministerio de Industria i Negosios de Djordania. (en lingua inglesa)
  3. Minister Maha Abdelraheem Saber Ali, Guide to Political Life in Jordan , Abdullah Ensour government "first Cabinet reshuffle". Jordan Politics.(en lingua inglesa)
  4. a b Maha Abdul Rahim Ali. Forbes Middle East. (en lingua inglesa)
  5. a b Maha Ali. Universita Almana de Djordania. (en lingua inglesa)

Atamientos eksternos trocar

  Klika akí para ver las imajes de Commons ensima de Maha Ali.