JTA
La Adjénsia Telegráfika Djudia, amijor konosida por el akronimo del su nombre en lingua inglesa, JTA (Jewish Telegraphic Agency) es una adjénsia de habér internasionala espesialisada en habér de las komunitas djudias para djurnales de todo el mundo. La JTA fue fondada el 6 de Fevrero de 1917 por Jacob Landau, baho el nombre de "Buró de Korrespondensya Djudia", kon el buto de azer difusion de habér de komunitas djudias enel Galut. La JTA tiene la su sede en Mueva York i burós de korrespondensya en Washington DC, Yerushalayim, Mosku i otras trenta i katro sivdades de Amerika del Nord, Amerika del Sud, Israel, Evropa, Afrika i Ostralya.
La JTA es una organizasion sin entereso de lukro i afirma no tener preferensia por dinguna rama del djudaismo o ideolojiya politika.