Haydée Chikly
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
Haydeé Chikly, endemas yamada Haydée Samama Chikly Tamzali (Tunis, 23 de Ogusto de 1906 - Tunis, 20 de Ogusto de 1998), era una aktrisa, eskritora i direktora de sinema de Tunesia. Era la prima aktrisa i eskritora de sinema del Mundo Arabo.
Biografiya trocar
Haydée Chikly nasio en 1906, ija del mudir de sinema tunesiano Albert Samama-Chikli i de Bianca Ferrero, una italiana nasida en Savoya. El nono de Chikly, David Samama, era un saraf del Bey de Tunesia, el kualo establesio el buro ke oy endiya es el Banko de Tunesia.[1]
Kariera trocar
El empesijo de la kariera komo aktrisa de Chikly era en 1921, enel filmo echo por el su padre, Zohra, enel kualo era la aktrisa prinsipala. El filmo kurto es konsiderado el primer filmo echo en Tunesia[2] i era apresentado enel sinema Omnia Pathé de Tunis el 21 de desiembre de 1922.[3][4] El mudir amerikano Rex Ingram, el kualo se topava en Tunesia aziendo el su filmo El arabo, le echo el ojo i demanda para eya si kere ser aktrisa enel su filmo. [4] El padre de Chikly se refuzava, ma diskues acheto, ma no desho ke la su ija aziera karriera en Hollywood, deke era una manseva de edad de 15 anyos. En 1923 [5], Chikly izo un muevo filmo del su padre, La Fille de Carthage, enel kualo endemas lavoro komo eskritora del dialog del filmo, el kualo era el primer filmo lungo de Tunesia dirijado por un tunesiano.[6]
En 1929, se espozo kon el Ardjeliano Khellil Tamzali i kon el bivio en Ardjelia, ande eskrivia i lavorava komo sekreter de la Kruz Kolorada i prezidenta de la Liga en Kontro del Kanser, komo kuenta enel su livro Images retrouvées.[4]
En los anyos 1990 abolto a Tunesia, ande lavoro eskriviendo kuentos para el djurnal La Presse de Tunisie ke eran publikados kada alhad.[4] Endemas eskrivio un livro ensima de la kuzina del Magreb kon 444 rechetas de Tunesia, Ardjelia i Maroko; de estas, 33 eran de kuskus.[7] En 1996, el mudir tunesiano Mahmoud Ben Mahmoud dirijo filmo kurto de 29 minutos yamado Albert Samama Chikli, ce merveilleux fou filmant avec ses drôles de machines ("Albert Samama Chikli, este divane aziendo filmos kon las sus divertyentes makinetas") enel kualo kuenta la vida del padre del sinema de Tunesia, Albert Samama-Chikli, espesialmente de imejes de sus filmos i de entrevistas kon Haydée.
Filmografiya trocar
- Zohra de Albert Samama-Chikli (1922)
- Aïn el Ghazal/La Fille de Carthage de Albert Samama-Chikli (1923)
- The Arab de Rex Ingram (1924)
- Un été à La Goulette de Férid Boughedir (1996)
Ovras trocar
- Images retrouvées, 1992
- La cuisine en Afrique du Nord : 444 recettes tunisiennes, algériennes et marocaines dont 33 couscous, 1999
Referensias trocar
- ↑ Haydée Chikly – Women Film Pioneers Project. Universita de Columbia
- ↑ Albert Samama Chikly (Samama-Chikli). Victorian Cinema (en lingua inglesa)
- ↑ Pouillon, François. Dictionnaire des orientalistes de langue française. Ed. Karthala. Paris, 2008. ISBN 978-2-845-86802-1
- ↑ a b c d Haydée Tamzali, la première princesse du grand écran. La Presse de Tunisie (en lingua fransesa)
- ↑ Pour Carthage. Les Annales coloniales. (en lingua fransesa).
- ↑ La communauté juive dans le cinéma tunisien. Confluences Méditerranée (en lingua fransesa).
- ↑ Tamzali, Haydée. La cuisine en Afrique du Nord. Pais. Vilo. 1999. ISBN 978-0-905-50054-6