Haredi

Los haredim (en ivrit חרדים), también konosidos komo ultraortodoksos o komo Los ke le temen al Dio, son djudios ortodoksos para los kualos la observansia de la relijion es espesialmente devota. Komo no egziste una avtoridad sentrala enel Djudaismo, los haredim a lo lungo del tyempo an dezvelopado alkunas tendensias diferentes, komo el hasidismo, i kada una de eyas interpreta los preseptos relijiozos komunes a todas las variantes ortodoksas kon alkunas variasiones. En la su gran mayoria, son ashkenazim, anke endagora tambien egzisten haredim sefardim i mizrahim.

Mansevos haredim leyendo el habér d'un pashakvil en Yerushalayim

Desde los fines del syéklo XIX, los haredim objektan la "modernidad" de Oksidente, tanto en lo kualo se refiere a kostumbras komo a ideolojiya. Antonses, komo no estan fiados de los dezvelopamientos modérnos de la sosyeté, biven en máales separadas de las sosyetés no-relijiozas, afilú de otros djudios, i siempre obeisan a lossus hahamim, los kualos, asigun eyos, son los unikos ke tienen un poder lejítimo i reál. Endemas de esto, son el grupo djudio ke mas se opoza al zionismo.

Oy endiya amostran una huérte presensia i enfluensia en Israel, ande tienen las sus propias máales, i asta sivdades, komo Betar Illit, Bnei Berak, Kfar Habad, Modi'in Illit, Ramat Bet Shemesh i los sus propios partitos politikos, butikas i eskolas. Endemás, egzisten grupos de haredim en munchas komunitas de la Galut, espesialmente en Amerika del Nord i en Evropa Oksidentala. Los haredim tienen el su propio periódiko, yamado Hamodia. Es kolay ubikar a un haredi en la kaleja, déke siempre va vistido de preto, kon kamiza blanka de mangs lungas, kon chapéo i kipa pretos i kaji siempre deshan kreser peyot. Las mujeres kuando kazadas siempre se visten de fustas lungas de kolores oskuros komo preto i grizo, uzan peluka kompleta, sheitel o kisui rosh para kuvrir las sus kavesas; alkunas uzan un chapéo en shabat. Los haredim, al kontrario ke los datim leumim, nunka uzan sandalikas.