George Maduro
George John Lionel Maduro era un mansevo djudio olandez, el kualo presto servis en la armada olandeza komo ofisial en la Batalia de los Payises Bashos enel anyo 1940 i espesialmente enel atako a La Aya. La sivdad miniatura de Madurodam yeva la su alkunya, ansina komo la plasa Maduroplein en Scheveningen, en la sivdad de La Aya.
Biografiya
trocar
Maduro nasió en la isola de Kurasao, el uniko ijo de Joshua i Rebecca Maduro, en una famiya sefardi. Estudio dirito en la Universita de Leiden. Por dechizión real, el 21 de Novembre de 1939 George fue yamado sigundo teniente de reserva en la Kavayeriya Olandeza. En la Gerra de los Payises Bashos i basho el su komando, gerreo en kontro de las tropas almanas ke estavan en Rijswijk kon reushitá i kapturaron parakaidistas. Kuando la Armada Olandeza pedrió, George fue yevado a la prizión por los almanes enel Otel Oranje, en Scheveningen. Kuando un anyo dempues salio de la prizión, los almanes demandavan ke todos los djudios uzasen una Magen David amariya. George Maduro no akseptó uzarla i se unio a la resistansia olandeza. El tentó adjudar a los pilotos Aliados a eskapar al Reyno Unido a traverso de Espanya, ma fue kapturado i yevado a prizión otra vez. Dempues de eskaparse de la prizión, tornó a la resistansia olandeza. George Maduro fue kapturado por la Gestapo i yevado a una prizión en Saarbrücken, para dempues ser yevado a la Kampo de Konsentrasion de Dachau[1], ande murio hazino de tifus pokos diyas antes de la liberasion del kampo por la armada amerikana enel anyo 1945. Esta entierrado enel sementario del kampo.
Enel anyo 1946, George Maduro resivió el onor de la Kavayero de Katrena klase de la Orden Militar de Willem, el onor mas alto i grande del Reyno de los Payises Bashos, por su eshuérso i lucha korajoza en la Batalia de los Payises Bashos en kontro de los almanes.[2] El es la unika persona de las Antiyas Olandezas ke tiene resivido este onor.
Un filmo dokumental ensima de la vida de George Maduro fue echo enel anyo 2001 por Alfred Edelstein.
Madurodam
trocarDempues de la Sigunda Gerra Mondiala, los padres de Maduro kontrivuyeron kon las parás para fraguar un parko miniatura yamado Madurodam, el kualo fue aperturado enel anyo 1952 en La Aya. Madurodam es konsiderado por la famiya Maduro komo un monumento en onor del su uniko ijo. Enel anyo 1993 fue fraguado un modelo a skala del lugar de nasimyénto de George Maduro enel parko.
Referensias
trocar- ↑ Award for bravery. The world's other Jewish president
- ↑ Citation for Maduro's medal. Bevrijdingintercultureel.nl (en lingua inglesa)