Ekspulsion de los djudios de Coro

La Ekspulsión de los djudios de Coro se refiere al kuando la komunita djudia de la sivdad venezuelana de Coro fue ekspulsada a la adá de Curaçao. Enel anyo 1827, un grupo de djudios sefardis de la adá de Curaçao migraron a la sivdad. 28 anyos dempués, kon la ekonomiya del paez akabada i muncho desempiego, el resentimyento en kontro de los ekstranjeros fue tomando kontrolo de los abitantes de la sivdad, los kualos kulparon a los merkaderes djudios de la krisa ekonomika. Dempués de protestas en las kalejas de la sivdad, la sivdad konsigió ekspulsar a la komunita djudia - 168 personas – de ritorno a Curaçao. La priméra vez ke los djudios eran ekspulsados de alkuna sivdad en Amerika.

Istorya

Los djudios avían yegado a Coro a dimanda de la kolonia olandeza en Curaçao para adjudar a estableser i defender el komersio nasiente entre la adá i Venezuela; ya enel anyo 1831 los residentes de la sivdad protestaban el avanso pishín de los djudios en la sivdad. El govyerno lokal reprimió los protestos i endemas ordenó un empuesto eksklusivo a los merkaderes djudios enel anyo 1832. Enel anyo 1835, dempues de protestos de los merkaderes djudios, el govyerno nasyonal trokó la ley para ke todos los ekstranjeros, no sólu los djudios, pagasen el empuesto, el kualo era dos vezes má alto ke el empuesto para los merkaderes venezuelanos. Andjak los merkaderes i las sus butikas sigiron prosperando i la djente sigio aziéndose kada diya má ostil a los djudios, deke la ekonomiya estaba kada diya ma destryuida.

En la anyada de 1840, el govyerno de la sivdad de Coro i la baza militar serkana a la sivdad empiesaron a pedir emprestimos sin empuestos a la komunita djudia de la sivdad, los kualos se konsideraban adelantros de los sus empuestos. Los "empuestos" se fueron trokando en "kontribusiyones voluntarias", las kualas no ivan ser pagadas. Kon temor del poder militar en la sivdad i la provensiya, el govierno nasyonal de Caracas ordeno a los ekstranjeros de Coro ke no achetasen pagar las "kontribusiyones" ke les pedía la armada de la provensiya. Los djudios de la sivdad izieron komo fue dimandado, i el 30 de Jenero de 1855, la baza militar de Coro dio las sus tropas de basha, kuando los komandantes no tinían komo pagarles.

Al diya siginte, se ankontró un panfleto por la sivdad, el kualo preguntava si no egzistían sufisientes butikas en la sivdad para poder pagar por la baza militar. Otros volantes eran avyertas amenasas a los ekstranjeros. I afilú otro se dirjiía direktamente a la komunita djudia,, sinyalando la “distorsionada avarisia” de los djudios por la “miseria i desesperansa” del puevlo. Endemás, en el panfleto se dizía ke “munchas ijas de Coro, antes modelos de virtud,” avían sido “prostituidas por los djudíos,” i se dimandava a los djudios a deshar la sivdad. Dos noches más tádre, asigún el istoryador Isidoro Aizenberg, 30 ombres armados tomaron kontrolo de las kalejas de la sivdad, disparando a las kazas ande bivían los djudios, tumbando las portas i destruyindo las butikas de los djudios.

Ma esta vez, el 10 de Fevrero, el último de los djudíos deshó la sivdad de Coro en un vapor enviado por el govyerno de Curaçao para reskatar a los sus sivdadanos. En un panfleto puvlikado ese diya en Coro se informo a la povlasión ke "kon aligriya vemos la muestra tyerra libbera de los sus opresores...los djudíos an sido ekspulsados por el puevlo."

El govyerno de Curaçao protestó la ekspulsión, déke danyava el komersio kon Venezuela, nombrando los diritos ke Venezuela devía a los ekstranjeros de akódro a los tratados internasionales. Los olandeses pidieron la kompensasiyon por las perdidas de los djudios i dimandaron endemas el su ritorno siguro a Coro i endemas izieron yegar a La Guaira tres naves de gerra para “negosiar” los termos. Caracas ignoró la dimanda deké si los djudíos se konsideravan afektados, tinían ke yevar el kavzo a un djuzgo en Venezuela.

La komunita ritorna

El konflikto diplomátiko sigió por tres anyos, asta ke dos militares venezuelanos konfesaron ke eyos avían eskrito los panfletos kon el teksto yamando a la violensia en kontro de los djudios en 1855, má dempues de nombrar el dirito a la libbertad de ekspresion, no resivieron kondena alkuna. Finalmente, el 6 de Mayo de 1858, el govierno de Venezuela achetó pagar los danyos i garantisar el ritorno de los djudios eksiliados de Coro. Ese mismo diya, un muevo panfleto se puvlikó en la sivdad, el kualo dizía ke "El puevlo de Coro no kere a los djudíos. Ahuéra, váyanse d'akí komo perros; i si no se marchan pronto los zamuros van disfrutar kon los su korpos.". Igual alkunos djudios aboltaron basho el kudio del muevo governador militar de la provensiya, andjak muncho menos de lo ke era la komunita orijinala, i oy endiya el betahayim uzado por los kolonos es konsiderado komo Monumento Nasyonal desde Marzo de 2004, i es el má antiko aún en uzo en Amerika.

En Djunio de 1902 se vieron otros atakos en kontro de la komunita en Coro, i los djudios bushkaron asilo en Curaçao, el kualo fue dado por el governador de la adá, J. O. de Jong Van Beek, ken envió la nave de gerra HNLMS Koningin Regentes a protejerlos. De ritorno a Kurasao la nave trajo ochenta mujeres i ninyos. En Djulio de ese mismo año, la misma nave fue enviada a La Vela de Coro por el resto de los djudíos, i tan sólu unos pokos se kedaron ayí para protejer las propiedades de los eksiliados.

Referensias

• Archivo General de la Nación, Sección Interior y Justicia, tomo 38, pág. 4 y siguientes.
• Through the sands of time. Judah M. Cohen. Brandeis. p. 94. 2004. ISBN 1584653418

Enlasos eksternos

• The Expelled Jews of Coro, Venezuela. Artikolo en la Jewish Virtual Library.
• Cambio cultural y expresiones antisemitas en Coro: año 1900. Por Blanca De Lima. Ponencia presentada en el IV Coloquio de Historia Regional y Local Falconiana UNEFM-Centro de Investigaciones Históricas del Estado Falcón-Ministerio de Educación. Coro, estado Falcón, Venezuela. 16-19 de noviembre de 1999