Djudios del Amazonas

Los Djudios del Amazonas (en ivrit: יהודי אמזונאס, "Yehudey Amazonas"; en kastilyano Judíos Amazónicos; en portugez Judeus Amazônicos) son las komunidades de desendientes de djudios de orijin mayormente marroki ke biven en las sivdades de la rejion del Amazonas, komo Belém, Santarém, Manaus, Iquitos, Tarapoto i otras.

Orijin

Los sus orijines se ubikan en los merkaderes djudios marrokis ke arivaron a la rejion durante el komersio de kaucho en las anyadas de 1880 i 1890. Yegaron afilu asta Iquitos.

Relasiones kon otras komunidades djudias

En Peru a egzistido un sistem de kastas desde los diyas de la kolonia Espanyola, lo kualo a produzido ke no egzista interaksiyon entre estos desendientes de djudios i la chika komunidad (unos 3000), en la su mayoria de orijin ashkenazi ke bive en la sivdad de Lima, la sivdad kapitala del paez, los kualos estan integrados en la elite blanka de orijin evropeo. Shukur a los eshuérsos de alkunos programas yisraelis de outreach, alkunos de los myembros de estas komunitas an echo giyur ortodokso i kompletaron la su aliya.

Komunidades de Djudios del Amazonas

Djudios de Belém i Manaus

Las alkunyas ankontradas en las sivdades de Belém i Manaus de akeyos djudios de oriojin Marroki o Espanyol inkluyen Alves, Abecassis, Aflalo, Abtibol, Abensur, Amzalak, Athias, Assayag, Azulay, Benarrós, Benacon, Benchaya, Benitah, Benmuyal, Bensadon, Bensoussan, Benzaken, Benzion, Bohadana, Benesby, Benchimol, Benayon, Bemergui, Bendayan, Benguigui, Benoliel, Bentes, Benzecry, Cagy, Chocron, Cohen, Dahan, Dor, Del Giglio, Elgaly, Elaluf, Elmescany, Fima, Foinquinos, Gabay, Garcia, Hamu, Hebron, Koifman, Israel, Larrat, Laredo, Levy, Ohana, Ovadia, Ohev Zion, Pazuello, Perez, Pereira, Pecher, Pinto, Sabbá, Sa, Salama, Salgado, Saraga, Serfaty, Sicsú, Siqueira, Salém, Salgado, Safdié, Serruya, Soares, Schwartz, Tayah, Tobelem, Yaeli i Zagury. Enel anyo 1828 fueron fondadas en Belém el kal Sha'ar Hashamayim i el kal Essel Avraham.

El filmo dokumentalo Eretz Amazonia (del direktor David Salgado), esta bazado enel livro de Samuel Benchimol "Eretz Amazonia: A Saga dos Judeus na Amazônia". Eyos migraron desde Marroko a la Amazonia durante el komersio del kaucho. Uzaban las linguas tradisionalas de las komunitas ke desharon: djudeo-espanyol, ivrit i Haketia.

Djudios del Amazonas konosidos enel mundo

• Samuel Benchimol, sientifiko i ekonomista brasiliano nasido en la sivdad de Manaus, el kualo dediko la su karriera a estudios sosyales relasionados kon el dezvelopamyento sustentavel de la rejion
• Abraham Medina, produktor kulturalo brasiliano, nasido en la sivdad de Belém, el kualo izo eshuérsos por trokar la sivdad de Rio de Janeiro en una meka turistika i kulturala mondiala.
• Isaac Benayon Sabbá, bisnesman brasiliano nasido en la sivdad de Belém i emprendedor dedikado al dezvelopamyénto del Nord de Brasil
• Christian Bendayan, pintor Peruano, nasido en la sivdad de Iquitos, konosido komo "El pintor de la shará".

Ver endemas

• Djudios de Marroko
• Sefaradi

Enlasos eksternos

• Los "Djudios de la shará" resiven un haham (en Kastilyano)
• Indiana Jones meets Tangier Moshe - Moroccan Jews in the Amazon