Vikipedya

Carole King

kantadera, pianista i kompozadora de musika amerikana
Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

Carol Joan Klein (Mueva York, 9 de Fevrero de 1942), conocida como Carole King, es una kantadera, pianista i kompozadora de musika amerikana, la kuala es konosida desde 1958, prinsipiando komo kompozadora en la Fragua Brill i diskues komo kantandera. Es la kompozadora kon mas reushita de la segunda parte del syeklo XX en los Estados Unidos, eskriviendo 118 kantikas pop ke yegaron al Billboard Hot 100.[1] King endemas eskrivio 61 kantikas ke reushieron en las listas del Reyno Unido,[2] las kualas la azen la kompozadora kon mas reushita del payis entre entre 1962 i 2005.[3]

Carole King, enel anyo 2002

King tiene aresividos katro premios Grammy i era metida en la Sala de la Fama del Rock and Roll (Rock and Roll Hall of Fame) i en la Sala de la Fama de los Kompozadores (Songwriters Hall of Fame) por modre del su lavoro, endjuntamente kon el su primer espozo, Gerry Goffin. Komo kantadera, tiene enrejistrados 25 albumos, de los kualos "Tapestry" es el mas reushido de la su kariera, deke era el primero en la lista de los albumos mas vendidos en Estados Unidos durante 15 semanas en 1971, i kedo en las listas durante 6 anyadas. Endemas, "Tapestry" yego a tener el record del album enel numero 1 por tiempo mas lungo, el kualo solo era kevrado por Whitney Houston kon The Bodyguard i Adele kon 21.


Biografiya

trocar

Primeros anyos

trocar

Carole King nasio el 9 de Fevrero de 1942 en Manhattan, una maale de la sivdad de Mueva York, ma kresio en Brooklyn, en una famiya djudia. El su padre, Sidney N. Klein, era pompero i la su madre, Eugenia Cammer, era maestra de eskola. Era yevada por la su madre a lisiones de musika desde ke era de edad de 4 anyos; esta anyada, los sus padres deskuvriron ke tenia un tono absoluto,[4] kon el kualo puedo yamar una nota musikala kuando la eskuchava.[5] Komo era muy chika para alkansar el piano kon el kualo prinsipio tanyer, la su madre la asentava enriva de una gia de telefon. Endemas de las lisiones de musika, ambezo kantar kuando ambezava enel lise James Madison de Mueva York, konformo parte del grup de bozes yamado The Co-Sines, troko el su nombre por Carole King i prinsipio enrejistrar klips de demostrasyon kon el su amigo Paul Simon pagando 25 dolares por enrejistrasion. La su prima kantika ofisiala era "The Right Girl", apresentada or ABC-Paramount en 1958 kuando eya eskrivio la kantika i la kanto aranjada por Don Costa.

Ambezo enel Queens College, ande konosio a Gerry Goffin, kon el kualo se espozo de edad de 17 anyos en un kazamiento djudio en Long Island en Ogusto de 1959, kon el kualo iva tener las sus ijas, Louise i Sherry. Desharon el kolej i bushkaron lavoro; Goffin komo adjudante kimiko i King lavorava komo sekreter. En las nochadas, eskrivian kantikas endjuntamente.

Kariera

trocar
 
Carole King kantando para los 1.500 askeres i marinos enel portaviones USS Harry S. Truman en la Mar Mediterranea enel anyo 2000.

El sharkidji Neil Sedaka, el kualo konosia a King desde la su manseves, enrejistro en 1959 "Oh! Carol", la kuala reusho. Goffin tomo la musika de la kantika i eskrivio una reposta yamada "Oh! Neil", la kuala era enrehjistrada por Carol esta anyada. El lado B del disko kontenia una kantika eskrita por Goffin i King yamada "A Very Special Boy". Diskues de eskrivir "Will You Love Me Tomorrow" para The Shirelles, un grup de mansevas pretas, i ke la kantika yegara al numero 1 de la lista Hot 100 de Billboard en 1961, Goffin i King desharon los sus lavoros i dechidieron konsentrarse en eskrivir kantikas. Mientres ke lavorava en la Fragua Brill, ande kantaron munchos sharkidji reushados de los anyos 1960, i eskrivieron kantikas para sharkidjis famozos komo "(You Make Me Feel Like) A Natural Woman" (Aretha Franklin), "Take Good Care of My Baby" (Bobby Vee), "One Fine Day" (The Chiffons), "Pleasant Valley Sunday" (The Monkees), "Up on the Roof" (The Drifters), "You've Got a Friend" (James Taylor) i "The Loco-Motion" (Little Eva). En estas anyadas, King tento prinsipar la su kariera komo kantante, ama sin reushar, i eskapo la su deshadura de Goffin en 1968.

Diskues de la su deshadura, King i las sus ijas arivaron a Los Anjeles kon el buto de prinsipar otruna vez la su kariera komo kantadera. Konformo un grup yamado "The City" (La Sivdad) endjuntamente kon Charles Larkey i Danny Kortchmar. El grup enrejistro el album "Now That Everything's Been Said" en 1968, ma izo fiasko. El grupo era diskues deritido, i en 1970, lavoro tokando el piano para el disko de B. B. King Indianola Mississippi Seeds. King dechidio eskrivir mas kantikas para el su album Tapestry, el kualo iva tener algunas muevas versiones de kantikas ke tenia eskritas kon Goffin, "Will You Love Me Tomorrow" i "(You Make Me Feel Like) A Natural Woman". Tapestry era una reushita de supito. Kon munchos hits komo el Billboard No.1 "It's Too Late", el album era topado enel lugar numero 1 por 15 semanadas, en las listas de Billboard por 6 anyadas i vendio mas de 25 milyones de kopias enel mundo. El album aresivio katro premios Grammy: álbum del anyo, sharkidji pop del anyo, yegando a ser la prima mujer en aresivir el premio kon "You've Got a Friend", enrejistro del anyo ("It's Too Late", eskrita por Toni Popa) i kantika del anyo ("You've Got a Friend"). El album se topa enel numero 36 de la lista de "los 500 mijores albumos de todos los tiempos" de la revista Rolling Stone. Endemas, la kantika "It's Too Late", se topa enel numero 469 de las 500 mijores kantikas de todos los tiempos de Rolling Stone.[6][7] Carole King: Music era apresentado en Disiembre de 1971 i aresivio sertifikasion de oro este mes, arivando al top ten enel lugar 8, i por munchas semanadas, Tapestry y Carole King: Music eran topados enel top 10 endjuntamente. En Jenero de 1972 arivo al numero 1, kon un single enel top 10, "Sweet Seasons". El album era re-sertifikado platino en 1972. Los muevos diskos de King, Rhymes and Reasons (1972), Fantasy (1973) i Wrap Around Joy (1974) eran sertifikados en oro. En 1973, Carole King dio un konserto kon entrada libbera enel Central Park de la sivdad de Mueva York i mas de 100.000 personas entraron.

Diskues de enrejistrar Speeding Time en 1983, dechidio bivir en Idaho, ande izo aktivismo por el ambiente. Diskues de 6 anyadas londje de la musika, abolto en 1989, enrejistrando City Streets i Color of Your Dreams en 1993, enel kualo Slash, el tanyedor de gitara de Guns N' Roses kolavoro. De este disko, la kantika "Now and Forever" era metida enel album del filmo de 1992 A League of Their Own.

En 1995, kantantes reushados dieron onor a Carole King, enrejistrando el album Tapestry Revisited: A Tribute to Carole King; de este disko varias kantikas eran aresividas kon reushita en la radio, komo la version de Rod Stewart de "So Far Away" i la ke Celine Dion izo de "A Natural Woman". Otros sharkidjis ke aparesen enel disko son Amy Grant ("It's Too Late"), Richard Marx ("Beautiful"), Aretha Franklin ("You've Got a Friend"), Faith Hill ("Where You Lead") i los Bee Gees ("Will You Still Love Me Tomorrow?"). Munchos otros sharkidjis tienen enrejistradas versiones de kantikas de Carole King kon muncha reushita, komo Gloria estefan ("It's Too Late", 1995), Celine Dion ("The Reason", 1997), Martika ("I Feel the Earth Move", 1989) i Barbra Streisand ("Where You Lead", 1972).

La kantika "Where You Lead (I Will Follow)", eskrita i kompozada por King enel anyo 2000, es la kantika prinsipala de la serie de televizyon The Gilmore Girls; en esta kantika, King kanta endjunto kon la su ija Louise, i King aparese en los plazos doseno, sinkeno i sesheno, komo la butikaria de una butika de musika.

Enel anyo 2012, King aresivio una estreya enel Kamino de la Fama de Hollywood.[8]

Famiya

trocar

King se esposo katro vezes: kon Gerry Goffin, Charles Larkey, Rick Evers i Rick Sorenson. Los sus ijos son las kantaderas Louise Goffin i Sherry Goffin Kondor, la oymadji Molly Larkey i Levi Larkey.

Diskografiya

trocar

Albumos

trocar

Singles

trocar
  • "It Might As Well Rain Until September," 1962, US #22 / UK #3
  • "He's a Bad Boy," 1963, US #94
  • "It's Too Late" / "I Feel the Earth Move," 1971, US #1 (AC #1), Gold / UK #6
  • "So Far Away" / "Smackwater Jack," 1971, US #14 (AC #3)
  • "You've got a friend," 1972, US # 11 (AC #4)
  • "Sweet Seasons," 1972, US #9 (AC #2)
  • "Been to Canaan," 1972, US #24 (AC #1)
  • "Believe In Humanity," 1973, US #28
  • "You Light Up My Life," 1973, US #67 (AC #6)
  • "Corazón," 1973, US #37 (AC #5)
  • "Jazzman," 1974, US #2 (AC #4)
  • "Nightingale," 1975, US #10 (AC #1)
  • "Only Love Is Real," 1976, US #28 (AC #1)
  • "High Out of Time," 1976, US #76 (AC #40)
  • "Hard Rock Cafe," 1977, US #30 (AC #8)
  • "Simple Things," 1977, US AC #37
  • "Morning Sun," 1978, US AC #43
  • "One To One" 1982
  • "One Fine Day," 1980, US #12 (AC #11)
  • "One to One," 1982, US #45 (AC #20)
  • "City Streets," 1989, US AC #14
  • "Now and Forever," 1992, US AC #18
  • "Love Makes the World," 2001

Referensias

trocar
  1. ↑ King Named Most Successful Female Songwriter by Whitburn
  2. ↑ The People Who Created The Soundtrack To Your Life. Amazon.com
  3. ↑ David Roberts, Guinness Book of British Hit Singles, 2005. ISBN 1-904994-10-5.
  4. ↑ Carole King. American Academy of Achievement.
  5. ↑ King, Carole. A Natural Woman. Grand Central Publishing. ISBN 9781405516723.
  6. ↑ Carole King - Biography. AllMusic.com
  7. ↑ ‘A Natural Woman’ by Carole King. Boston Globe
  8. ↑ Carole King receives Hollywood Walk of Fame star. ABC

Atamientos eksternos

trocar
  Klika akí para ver las imajes de Commons ensima de Carole King.
Acojido del aderesso "https://lad.wikipedia.org/w/index.php?title=Carole_King&oldid=213216"