Aliansa Yisraeliana Universala
La Aliansa Yisraeliana Universala (en fransez Alliance Israélite Universelle,en ivrit כל ישראל חברים ) es una organisasiyon polítika establesida en Fransia enel anyo 1860 kon el buto de ofreser ayudo a djudios. La rason de ser de la Aliansa es la ekspresiyon de los muestros hahamim Kol Yisrael arevim ze laze (כל ישראל ערבים זה לזה), la kuala se treslada ala lingua fransesa komo Tous les israelietes sont solidaires les un des autres ("Todos los djudios son responsávels los unos de los otros"). [1]
Los sus fondadores fueron un grup de djudios franseses, entre eyos Adolphe Cremieux, los kualos tinían las parás presisadas para ayudar a akeyos djudios proves, ofresiendo apoyo polítiko, ayudando a emigrar a otros i finalmente kriando programas de edukasiyon djudia en la Evropa Orientala, Medio Oryente i Áfrika del Nord. Aperturó la su primera eskola en Tetuan, Marroko enel anyo 1862. [2] Enel anyo 1945 manifestaron el su apoyo al Zionismo (movimento polítiko para la kriasion de un estado djudío) i enel anyo 1946 las sus aktivitás diplomátikas fueron tomadas basho el kontrolo del Konsesho Konsultivo de Organisasyiones Djudias en la sivdad de Mueva York.