Betahayim Djudio de Rodes
El Betahayim Djudio de Rodes se puede dizir ke es el muevo sementario djudio de la isola.
Dempues de la Primera Gerra Mondiala, la isola de Rodes fue tomada por Italia dempues de la okupasion ottomana de unos 400 anyos[1]. Para estos diyas, la komunidad djudia estaba konformada por unas 500 personas las kualas bivian kon los demas abitantes de la isola.
El muevo governo Italiano demandó ke el antiko betahayim djudio, el kualo se ankontraba ahuera de los muros de la sivdad, tinia ke ser kitado. Munchas personas konsigieron trokar las tumbas de la su famiya de lugar, ma las famiyas mas proves no reushieron esto. En el lugar se desinyo un parko i a la komunidad el governo les entrego un espasio ubikado serka del sementario musulmano, en el kamino de Kalithea. Las tumbas ke kedaron enel sitio fueron kitadas i el su marmol uzado para el palasio ke Benito Mussolini mando fraguar en la montanya. Las tumbas mas antikas trokadas de lugar son de la anyada de 1870 [2], los kualos estan ubikados al sud de sementario.
Oy endiya, shukur al entereso i adjuda de djudios sefaradis ke biven en los Estatos Unitos d'Amerika, se konsigio sakar de la tierra munchas de las tumbas ke kedaron en lo ke era el antiko betahayim; la mas antika es del syeklo XVII. La parte nord del betahayim tiene unas 150 tumbas, las kualas pertenesen a personas ke amortaron en 1938 i dempues, endemas de las ke fueron amortadas durante un atako a la isola durante la Sigunda Gerra Mondiala. Endemas en esta parte del sementario, se ankontra una plaka kon los nombres de las mishpahás djudias ke fueron ekspulsadas de Rodes.
Referensias trocar
- ↑ Recordando a los Judíos de Rodas. Por Sol Menashe.
- ↑ Jewish Community of Rhodes: The Cemetery