Primera Gerra Mondiala
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
La Primera Gerra Mondiala yegó a ser una gerra dezvelopada entre las anyadas de 1914 i 1918; orijinada en la Evropa i por modre de la rivalitad entre los payises metidos en la gerra, kresió i yegó a ser la primera en gerreyarse en mas de la metad del 'olam. Enel anyo 1914 era la gerra kon mas amortados i feridos de la istorya. Antes de la Sigunda Gerra Mondiala, esta gerra era yamada Gran Gerra o Gerra de las Gerras. En esta gerra las grandes potensias del olam, las kualas se engruparon en dos bandos en kontro: los Aliados de la Triple Entente i las Potensias Sentralas de la Triple Aliansa.
Izieron parte de la gerra mas de 70 milyones de soldados, de los kualos mas de 60 milyones de evropeos,[1] lo ke la aze una de las gerras mas grandes de toda la istorya. Mas de 9 milyones de soldados fueron amortados,[2] munchos a kavza de la mueva teknolojiya militar.
1914 trocar
El 28 de Djunio de 1914 un terroristo serbio de Bosnia i Herzegovina yamado Gavrilo Princip, mata en la sivdad de Sarajevo al prins eredero del Imperio Ostro-Madjar. Ostria-Madjaristan embiya un ultimatum a Serbia i deklara la gerra el 12 de Djulio. El Imperio Ruso se aze al lado de Serbia i antonses tiene su empesijo la primera Gerra Mondiala. Entre el 28 de Djulio i el 4 de Ogusto entran en gerra el Imperio Ostro-Madjar i Almania en kontro de Serbia, Rusia, Fransia i Gran Bretanya. El Imperio Otomano izo gerra en kontro de Rusia el 29 de Oktobre de 1914 en la rejion entre los lagos Van i Urmia i en kontro de las minoriyas etnikas de la rejion (armenios, kristyanos asirios i kurdos).
En los Balkanos los serbios piedren tierra pishín. En Ogusto de 1914 la armada del Imperio Alman gerreyan en kontro de la armada rusa; en Sietembre los rusos yegan a Galitzia. En noviembre de 1914 los serbios piedren Belogrado i la Turkiya entra ofisialmente ala gerra del bando de Almania. Eskapando 1914 los serbios tornan a Belogrado.
1915 trocar
En Avril del anyo 1915 los payises aliados yegan a los Dardanelos, ke kvzó el empesijo de la Batalya de Gelibolu, ma no tienen reushitá pishín i eskapa en Jenero de 1916. En Avril de 1915 tuvo su empesijo una revolta armenia en la rejion de Van. En Mayo de 1915 la Italia entra en la gerra enel bando de los aliados. En Djulio, 50.000 armenios yegaron ala sivdad de Halep fuyendo de la deportasion i djenosidio de la armada otomana i kurdos. En Djulio-Ogusto, las armadas ostriaka i almana enel frente ruso. En Oktobre los aliados yegan ala sivdad de Selanik; esto krio el "frente del Oryente". El 14 de Oktobre de 1915 Bulgaria entra en gerra en kontro de Serbia kon el buto de tomar la parte de la Makedonia ke okupó en la Primera Gerra de los Balkanos i diskués de la Sigunda Gerra de los Balkanos (aktuala Repuvlika de Makedonia). Esto izo ke los serbios no puediesen defenderse de los ostro-madjaros. Entre Deziembre de 1915-Jenero de 1916 la armada serbia se kita de Korfu a traverso de la Albania i la armada bulgariana okupa la parte serbia de Makedonia i azen frente a los aliados ke yegaron a Selanik el 15 de Oktobre.
1916 trocar
En Djunio-Ogusto de 1916, la armada rusa ataka en Galitzia, basho la direksiyon de Brusilov. Desde Djulio de 1916 los serbios kitados de Korfu son yevados al frente de Oryente. El 27 de Ogusto de 1916 Rumania deklara gerra a Ostria-Madjaristan. El 28 de Ogusto de 1916 Rumania entra ofisialmente en la gerra del bando de los aliados, i esto aze ke Bulgaria bushke la asosiasion kon las potensias sentralas i antonses okupa la Dobrudja del Sud, ke la pedrió antes en la Sigunda Gerra de los Balkanos. En Deziembre los almanes yegan a Bukureshti.
En 1916 la armada rusa yeva a Erzurum, Trabzon i Erzincan, atakando a los musulmanos de la rejion. Aki, la gerra eskapó entre Ogusto de 1916 i Deziembre de 1917.
1917 trocar
En Fevrero-Marso tiene su empesijo la Revolusion Rusa. El 6 de Avril los Estados Unidos entran ala gerra. En Avril de 1917 el govierno ruso da lesensia a los refujiados armenios para tornar ala Anatolia Oryentala. Unos 150.000 armenios tornaron ala rejion de Van, ande puedieron tener trigo de enverano. El 27 de Djunio Gresia entra ala guerra enel bando de los aliados. En Djulio el atako ruso no tuvo reushitá. El 24-27 de Oktobre los italianos piedren en la Batalya de Caporetto. El 6-8 de Noviembre se produze la Revolusion de Oktobre en Rusia. La Rumania keda sin ayudo de Rusia i antonses es sinyaturado en Focşani un akódro para eskapar de la gerra el 9 de Disiembre kon las potensias sentralas, Almania i Ostria-Madjaristan.
1918 trocar
El 8 de Djenero el presidente Woodrow Wilson nombra los 14 pontos i endemas se krio una asamblea konstituyente (seym) de Transkavkazia, la kuala tenia 112 miembros, 33 de eyos armenios. En la Transkavkazia egzistian munchas divisiones, ke azían al muevo payis kon penserios desde el su empesijo: los azeris, ke eran pro-otomanos; los armenios, anti-otomanos, i los jeorjianos bushkavan la paz. El 3 de Marso, la Rusia bolchevik i las potensias sentralas sinyan el akódro de Brest-Litovsk i por el kualo, el 3 de Marso de 1918 la Rumania es kitada de todo el ayudo ruso i las potensias sentralas tornan en su atako. Entre Marso i Avril el Imperio Otomano empesija el atako i yega a toda la rejion entre Van i Kars, lo ke kavzó ke munchos armenios fuyeran al nord-este. En Avril, el Seim de Traskavkazia deklaró la su independensia, mientres e los otomanos yegavan serka de Djerevan. En Avril de 1918 la Repuvlika Demokratika de Moldavia deklara la su union kon la Rumania. El 7 de Mayo se sinya el akódro de Bukureshti entre la Rumania i las potensias sentralas, el kualo kavza ke la Rumania piedra la Dobrudja del Sud i 170 viyas de los Karpat kedan para Madjaristan. Vlakia esta ainda okupada i kale de produzir trigo i petrol para Almania i Ostria-Madjaristan.
En mayo Transkavkazia fue partajada diskués de la dekalarasion de la independensia de Jeorjia. Los armenios tienen reushitá en kontro de los otomanos en la batalya de Sardarabad, ma en Djunio akavan sinyaturando un akódro en la sivdad de Batumi ande dan a los otomanos la rejion del treno entre Aleksandropol i Chulfa i endemas lesensia para ke la armada otomana pase a traverso de Armenia para yegar a Azerbaidjan. El 29 de Sietembre yega al su fin el frente del Oryente i Bulgaria sinya un akódro. El 3 de Oktobre, el tsar Fernando de Bulgaria se kita del trono para Boris III. El 30 de Oktobre, la Turkiya aksepta kitarse de la gerra.
En Djunio de 1918 los otomanos yegan a Azerbaidjan i en Ogusto demandan la kestión de Karabah. Una asamblea kon majorita armenia refuzó la union kon Azerbaidjan, ma no tenia el pueder de ir en kontro de los otomanos. Kon el akódro de Mudros del 30 de Oktobre de 1918, los otomanos tornaron a las sus lineas antes de 1914, mientres ke la armada ingleza kedó kudiando la Transkavkazia. El 3 de Noviembre es sinyaturado el akódro de Villa Giusti, ke akava kon el Imperio Ostro-Madjar. El govierno de Rumania yega a un akódro el 11 de Noviembre kon Almania. El 15 de Noviembre los rumanos invaden Transilvania. El 28 de Noviembre, la Bukovina, la kuala era una provinsia de Ostria-Madjaristan, demanda la union kon Rumania. El 1 de Disiembre de 1918 los vlakos de Transilvania i de Madjaristan azen una reunion en Alba Iulia, ande konforman una asamblea ke demanda la union konla Rumania.
Bibliografiya trocar
- Jesús Hernández Martínez, Todo lo que debe saber sobre la I Guerra Mundial (Nowtilus, 2007). ISBN 978-84-9763-413-7
Ver endemas trocar
Referensias trocar
- ↑ Bade, Klaus J. i Brown, Allison. Migration in European History. ISBN 0-631-18939-4. Ed. Blackwell, 2003
- ↑ Military Casualties of World War One
