Haim Weizmann

Haim Azriel Weizmann (en ivrit, חַיִים וַיְצְמַן) era un emportante kémiko, dirijente zionista britániko i el primér presidente del Estado de Israel. Nasió el 27 de Novembre de 1874 en la viya de Motol, serka de Pinsk, en la aktuala Belarus, antonses parte del Imperio Ruso.

Haim Weizmann

Haim Weizmann nasió en una famiya kon parás, lo kualo le permetió estudiar Kemika en la Universita de Friburgo (Suisa), de ande se graduó en la anyada de 1899. Izo el su doktorado en la Universita de Jinebra i enel anyo 1904 empiesó a lavorar enel Departamento de Kemika Orgánika de la Universita Victoria de Manchester. Se izo konosido antonses deke desvelopó la asetona, un solvente era uzado para produzir eksplosivos, a traverso de la fermentasiyon de la bakteria Clostridium acetobutylicum, la kuala es endagora konosida en su onor komo organismo Weizmann. Haim Weizmann fue el primero en determinar el modo de uzar la fermentasiyon de las bakterias para produsir munchas sustansyas; es konsiderado el padre de la fermentasiyon industriala.

Karriera komo zionista

Dempues de la Priméra Gerra Mondiala, se fue a bivir a Eretz Israel, endagora kontrolado por el Reyno Unido, en bushkida de un dialog kon los lideres arabos de la rejion. Haim Weizman es konsiderado el lider del yamado zionismo sintetiko, el kualo se topa entre el zionismo revisiyonista de Djabotinksy i el zionismo de siedra, de David Ben Gurion.

Haim Weizmann murió el 9 de Novembre de 1952. Fue entierrado, asigun el su dezeyo, enel gan de la su kaza, la kuala konforma parte oy endiya del Instituto Sientifiko Weizmann.