Francis Drake

Francis Drake (Crowndale, 1543 - Portobelo, 28 de Djenero de 1596) era un konosido navegador, eksplorador i korser britaniko. Es el primer inglezo en tornar alderedor del 'olam.

Biografiya

Nasio en una famiya protestante la kuala se fue a bivir a Kent mientres la revolta katolika de 1549.

Se izo mariner desde mansevo i se fue ala mar Karibe bushkando la rikeza ke trushían las naves del Imperio Espanyol. Un diya la su nave fue atakada por las naves espanyolas, anke egzistia una tregua, lo kualo muchiguó el su odio por los katolikos. Desde ese diya, se trokó en un enemigo del Imperio Espanyol. Enel anyo 1573 atako el porto kolombiano (oy parte de Panama) de Nombre de Dios kon el buto de tomar las naves de trezoros espanyolas. Tomó el oro ke tenian las naves, ma deshó la plata por modre del su peso. Esta aksion izo ke la korona ingleza le apoyase. Aresivió parás del Konde de Essex i la reina Elizaveta I de Inglaterra le dio enel anyo 1581 el titolo de Sir.

Enel anyo 1577, a reina le demandó azer eksplorasiones enel oseano Pasifiko i ansina yegó a ser el primer inglezo en treskrusar el Estrecho de Magayanes i el primer inglezo endemas en tornar alderedor del 'olam.