La Esnoga de Lisboa, yamada Shaaré Tikvá (Puertas de Esperansa) es una esnoga istorika i la esnoga prinsipala de la sivdad de Lisboa, ubikada en la kaleja Alexandre Herculano, en la máale de São Mamede.

La presensia djudia en Lisboa se puede trasar asta empieses de la Edad Media, má la komunita iva sufrir un golpe basho enel anyo 1497, kuando un edikto del Rey Manuel I iva ordenar a los djudios a konvertirse al kristyanismo o deshar el paez. Todas las esnogas de la sivdad fueron konfiskadas por el Rey i entregadas a ordenes relijiozas kristyánas. Para akeyos djudios ke se konvirtieron al kristyanismo, yamados Muevos Kristyanos (cristãos novos), el establesimyénto de la Inkisisiyon Portugueza enel anyo 1536 paso a ser un perikolo permanente de ser persegido.

La situasiyon para el djudaismo en Portugal trokó al empiese del syéklo XIX, kuando se akabó la Inkisisiyon Portugeza i munchos sefardim de Marroko i Jibraltar, en la su mayoria merkaderes, empiesaron a migrar a Lisboa i a otras partes del paez. Durante todu el syéklo XIX, la chika komunita de Lisboa no tinía esnoga i tinían ke meldar en kazas partikolares.

Finalmente, enel anyo 1897 se establesió una komisión para fraguar una esnoga sentral en Lisboa. El proyekto fue konfiado al konosido arkitekto Miguel Ventura Terra, i el fraguamyénto empiesó enel anyo 1902. La kara prinsipala de la esnoga da asya un kortijo interno, ya ke la Ley Portugeza de antonses iva tener defendido para akeos templos no-Katolikos ke las sus karas prinsipalas den asya la kaleja.

Aperturada enel anyo 1904, la Esnoga de Lisboa fue la priméra esnoga fraguada en Portugal desde fines del syéklo XV. Ventura Terra disenyó un templo misturando los estils Neo-Bizantino i Neo-Romanesko, konsistente kon la moda moriska para la arkitektura de esnogas.

Enel anyo 2004, una seremonia se izo para selebrar los syen anyos de la esnoga. El presidente de Portugal, Jorge Sampaio i el Rabino Shefe Sefardi de Israel, Shlomo Amar estaban presentes en la seremonia i dieron diskorsos.

Referensias trocar

Ver endemas trocar

Enlasos eksternos trocar