Autoridad Nasionala del Ladino

La Autoridad Nasionala del Ladino, fue kreada en 1997, en baza de una ley adoptada por la Knesset el 17.3.1996. Esta enkomendada del estudio de la lingua ladina o djudeo-espanyola, de su defensa i de su konservasion. Endemas, edita la revista Aki Yerushalayim, tuda eskrita en ladino i ke kontiene artikolos de intereso para la komunita sefaradi en Israel i el mundo entiero.

El primero prezidente de su konsejo fue el V Prezidente del Estado de Israel, Sr Yitshak Navon, i su vise-prezidente, el direktor de la revista Aki Yerushalayim, Sr. Moshe Shaul.

Butos de la ANL [1]Trocar

  • Propagar al seno del puevlo el konosimiento de la kultura djudeo-espanyola en todas sus formas, promoviendo a este efekto la investigasion de esta kultura, su ensenyansa i su difuzion, entre otras en los medios de komunikasion.
  • Ayudar a la fundasion i al enreziamiento de institusiones aktivas en el kampo de la kultura djudeo-espanyola.
  • Promover, enkorajar i ayudar al arekojimiento, dokumentasion i katalogasion de los trezoros de la literatura djudeo-espanyola.
  • Promover, enkorajar i ayudar a la edision de livros de autores kontemporaneos ke eskriven sovre temas de la kultura djudeo-espanyola, ansi ke ovras de valor de la literatura djudeo-espanyola, en su lengua orijinala o en traduksion al ebreo.
  • Organizar i promover aktividades de informasion i esklaresimiento sovre las komunitas sefaradis ke fueron eksterminadas en la Shoá i las graves konsekuensas ke esto tuvo para la kultura djudeo-espanyola.

ReferensiasTrocar

Atamientos eksternosTrocar